იუსტიციის უმაღლესი საბჭო თავისი არამოსამართლე წევრებისთვის ხელფასის გაზრდას განიხილავს.
საბჭოს წევრი ნაზი ჯანეზაშვილი „ლიბერალთან" განმარტავს, რომ „საერთო სასამართლოების შესახებ" ორგანული კანონის მიხედვით, არამოსამართლე წევრების თანამდებობრივი სარგო სააპელაციო სასამართლოს მოსამართლეების ანაზღაურებას უნდა უტოლდებოდეს. წელს მოსამართლეებს დაენიშნათ ყოველთვიური დანამატი, რის გამოც ხელფასები თანაბარი აღარაა და ანაზღაურება შესაძლოა, არამოსამართლე წევრებსაც გაეზარდოთ.
„იუსტიციის საბჭომ მიმდინარე წელს მიიღო გადაწყვეტილება და სააპელაციო სასამართლოს მოსამართლეებს თანამდებობრივ სარგოსთან ერთად იმავე ოდენობის ყოველთვიური დანამატი მიეცემათ. დღევანდელი დისკუსია სააპელაციო სასამართლოს მოსამართლისა და არამოსამართლე წევრების თანამდებობრივი სარგოს გათანაბრებას ეხებოდა“, - განაცხადა ნაზი ჯანეზაშვილმა.
ჯანეზაშვილის თქმით, მან დააყენა წინადადება, რომ არ მიიღებდა მონაწილეობას საკითხის განხილვაში, ვინაიდან თავადაც არამოსამართლე წევრია.
„მივიჩნიე, რომ ჩემი მონაწილეობა უხერხული იქნებოდა და დავაყენე ეს წინადადება. ამის გამო, საკითხის განხილვა გადაიდო შემდეგი სხდომისთვის. ერთადერთი არამოსამართლე წევრი ვიყავი, ვინც ამ საკითხზე ეს პოზიცია გამოხატა. სხვა წევრები ან არ ესწრებოდნენ საბჭოს სხდომა, ან არ მიუღიათ დისკუსიაში მონაწილეობა. იუსტიციის საბჭოს საბოლოოდ გადაწყვეტილება არ მიუღია და ითქვა, რომ საკითხი შემდეგ სხდომაზე განგვეხილა“, - ჰყვება ნაზი ჯანეზაშვილი.
