დღეს დარგობრივი ეკონომიკისა და ეკონომიკური პოლიტიკის კომიტეტის სხდომაზე საზოგადოებრივი მაუწყებლის სამეურვეო საბჭოს თავმჯდომარის მოვალეობის შემსრულებელმა ირინა ფუტკარაძემ „საზოგადოებრივი მაუწყებლის“ 2017 წლის ანგარიში წარადგინა.
„მომხმარებლის ქცევის გათვალისწინებით პროგრამირების აწყობა, ეს რას ნიშნავს, პროგრამირება მე ვიცი, ადამიანს რომ აპროგრამებენ“, – ასეთი კითხვით მიმართა საპარლამენტო უმრავლესობის წევრმა, დავით ჭიჭინაძემ საზოგადოებრივი მაუწყებლის სამეურვეო საბჭოს თავმჯდომარის მოვალეობის შემსრულებელს, ირინა ფუტკარაძეს.
„თქვენ შეიძლება ასე იცით, რომ ადამიანს აპროგრამებენ, მაგრამ გეტყვით, ეს კონკრეტულად რას ნიშნავს. 2016 წელს ჩატარდა კვლევა, ეს იყო რაოდენობრივ-თვისობრივი კვლევა, სადაც განისაზღვრა, რომელ ასაკობრივ ჯგუფს რომელი გადაცემა აინტერესებდა, რომელ საათებში უყურებდა ამა თუ იმ გადაცემას და რომელი მათგანი იყო მისთვის მნიშვნელოვანი. შემდეგ ეს გახდა საფუძველი იმისა, რომ მომხდარიყო პროგრამირება ისე, რომ გათვალისწინებულიყო ეს ქცევა, ჩვენ მიერ კვლევის შედეგად გამოკითხული მოქალაქეების ქცევა პროგრამირებაში. ანუ ზოგს მოსწონდა სპორტი, სერიალები და ასე შემდეგ“, – უპასუხა ირინა ფუტკარაძემ.
ასევე დავით ჭიჭინაძემ განაცხადა, რომ სამეურვეო საბჭოს 2017 წლის ანგარიში საზოგადოებრივი მაუწყებლის პოლიტიკას აცდენილია.
დარგობრივი ეკონომიკისა და ეკონომიკური პოლიტიკის კომიტეტმა მხარი არ დაუჭირა „საზოგადოებრივი მაუწყებლის“ 2017 წლის ანგარიშის პლენარულ სხდომაზე განხილვას.