კლუბ „ბასიანის" ერთ-ერთი დამფუძნებლის, ზვიად გელბახიანის დაკითხვა თბილისის მთავარ სამმართველოში დასრულდა. გელბახიანის თქმით, გამომძიებელმა მას კლუბის შესახებ დაუსვა შეკითხვები, კერძოდ, როდის გაიხსნა კლუბი, ვინ არიან მფლობელები და ა.შ.
მისივე თქმით, მან გამომძიებელს კლუბ „ბასიანის" გახსნის შესახებ ჰკითხა, თუმცა კონკრეტული პასუხი კლუბის გახსნასთან დაკავშირებით ვერ მიიღო.
"კაფე „გალერი" გახსნეს, ბასიანი კვლავ დახურულია. ეს კიდევ ღიმილისმომგვერელია ჩემთვის. ამის შემდეგ კიდევ ერთხელ მიმძაფრდება განცდა, რომ ამ ყველაფერს პოლიტიკური სარჩული აქვს. „ბასიანი" და „თეთრი ხმაური“ ერთობლივად იბრძვიან სისტემის წინააღმდეგ, სწორედ ამიტომ ვფიქრობ, რომ ამის გამო გადაავადეს „ბასიანის“ გახსნა." - განაცხადა დაკითხვიდან გამოსულმა გელბახიანმა. მისი თქმით, ის ფიქრობს, რომ „ბასიანი ისჯება"
16 მაისს გამოძიების ფარგლებში დაკითხეს კლუბის „ბასიანის" ერთ-ერთი თანამფლობელი ტატო გეთიაც.