„გალერიში“ საგამოძიებო ღონისძიებები დასრულდა. „ბასიანში“ გრძელდება - გვითხრეს შინაგან საქმეთა სამინისტროში.
როგორც უკვე ცნობილია, კაფე „გალერი" ოფიციალურად გაიხსნა. სამართლადამცავებმა შენობას ლუქი მოხსნეს და გასაღები მფლობელებს გადასცეს. კლუბის დამფუძნებელმა, ალექსანდრე ანთაძემ „ლიბერალის" ჟურნალისტს კლუბის გახსნის შესახებ ცნობა დაუდასტურა.
როგორც „ლიბერალის" ჟურნალისტს კლუბში უთხრეს, „გალერი“ დღეიდან, ბარი „ბლოუ“ (რომელიც შენობის მეორე სართულზეა) კი კვირის ბოლოს შეძლებენ სტუმრების მიღებას.
კლუბი „გალერი“ 12 მაისის სპეცოპერაციის შემდეგ დალუქული იყო და იქ საგამოძიებო მოქმედებები ტარდებოდა. გამოძიების ფარგლებში შს სამინისტროში დაკითხეს კლუბის ერთ-ერთი მფლობელი. 12 მაისის სპეცოპერაციის ღამეს შს სამინისტრომ 8 პირი ნარკორეალიზატორობის ბრალდებით დააკავა. აქედან ერთ-ერთი,უწყების ცნობით, კლუბ „გალერის" დაცვის უფროსი იყო.
რაც შეეხება „ბასიანს" - 12 მაისის სპეცოპერაციის შემდეგ კლუბი დალუქულია. მფლობელებისთვის უცნობია, როდის გაიხსნება კლუბი. შს მინისტრის თქმით, საგამოძიებო მოქმედებები ჯერ ისევ მიმდინარეობს კლუბის ტერიტორიაზე. 17 მაისს გამოძიების ფარგლებში ტატო გეთია დაკითხეს. დღეს გამოძიებამ ზვიად გელბახიანიც დაკითხა.
27 მაისს 6 საათზე ევროპის მოედანზე კლუბ „ბასიანის" მხადამჭერები აქციას გამართავენ.
„თუ BASSIANI-ის კარი არ გაიღება 1 ივნისამდე, ფინანსური ზარალის გამო, ის შესაძლოა, დაიხუროს, თუმცა მისი კარი ყოველთვის ღია იყო თავისუფლებისა და თანასწორობისთვის მებრძოლი ათასობით ადამიანისთვის.
დატერორებული და დალუქული BASSIANI დღეს პოლიტიკური მძევალია. ჩვენ, სხვა კლუბებთან ერთად, სისტემის დარტყმის მთავარ სამიზნედ ვიქეცით. თვეზე მეტია გვაშანტაჟებენ, მიზანმიმართულად გვესხმიან თავს, დღემდე უცნობი სუბსტანციით ადამიანთა ინტოქსიკაციისა და ტრაგიკული გარდაცვალების ფაქტებზე ჩვენსკენ იშვერდნენ თითს, როდესაც პირველებმა გავუშვით საზოგადოებაში განგაშის სიგნალი.
დაარსების დღიდან, ჩვენი სფერო მხარს უჭერდა სოციალური ცვლილებებისთვის მებრძოლ სამოქალაქო მოძრაობებს, ხელს ვუწყობდით ჩაგრული ჯგუფების ემანსიპაციის პროცესს, სწორედ ამიტომ, 12 მაისის „შავი პარასკევის” საპოლიციო ტერორი, არ იყო ტერორი მხოლოდ საკლუბო სივრცეებზე, არამედ ყველა იმ ადამიანსა და ჯგუფზე, ვინც მხარში გვიდგას და ჩართულია უთანასწორობასთან ბრძოლაში.
27 მაისი სიმბოლური თარიღია, ბერლინის მემარცხენე კოლექტივები და 70-მდე გერმანული ღამის კლუბი დემონსტრაციითა და მასობრივი რეივით გააპროტესტებს მათთან არსებულ პრობლემებს.
შემოგვიერთდით, ჩვენთვის საამაყო თბილისის საკლუბო სცენა საფრთხეშია, BASSIANI / HOROOM-ის დასაბრუნებლად ვიკრიბებით იქ, სადაც დაიწყო ჩვენი იდეა - ევროპის მოედანზე.
დღეს ჩვენი ბრძოლა ნიშნავს, ბრძოლას სოციალური ცვლილებებისთვის!
გახსენით დახურული კარი, დაგვაბრუნეთ სახლში! " - ვკითხულობთ აქციის შესახებ გავრცელებულ განცხადებაში.
