3 ივნისს მოგვიწევს გადასვლა საგაფიცვო პერიოდზე და მეტროპოლიტენის გაჩერება, - ამის შესახებ მეტრო „რუსთაველთან" გამართულ აქციაზე მემანქანეების დამოუკიდებელი პროფკავშირის „ერთობა-2013-ის" გამგეობის თავმჯდომარემ რატი კაპანაძემ განაცხადა.
მისი თქმით, „ერთობა-2013-ში" გაწევრიანებული მეტროპოლიტენის თანამშრომლები არ აპირებენ დაემორჩილონ სასამართლოს მიერ მიღებულ გადაწყვეტილებას, რომელმაც მათ სამუშაო საათებში გაფიცვა აუკრძალა.
„3 ივნისს გადასვლა მოგვიწევს საგაფიცო პერიოდზე და მოგვიწევს მეტროპოლიტენის გაჩერება. დღეს კიდევ ვიტოვებთ იმედს, რომ ამ აქციით გავაგონებთ ხმას ადამიანებს, რომლებსაც ხელეწიფებათ გადაწყვეტილებების მიღება. სასამართლოს მიერ მიღებულ უკანონო გადაწყვეტილებას ჩვენ არ დავემორჩილებით და გამოვიყენებთ კონსტიტუციურად მინიჭებულ უფლებას”, - განაცხადა რატი კაპანაძემ.
