„რუსთავი 2-ის“ გენერალური დირექტორი ნიკა გვარამია საქართველოს საპატრიარქოს მიერ დღეს გაკეთებულ განცხადებას ეხმიანება. მისი თქმით, საპატრიარქოში დღეს არიან ძალები, რომლებიც 21-ე საუკუნეში ცენზურის შემოღებას ითხოვენ და ადამიანებს შორის შუღლს აღვივებენ.
„დარწმუნებული ვარ რომ პატრიარქი არც ფლობს იმის შესახებ ინფორმაციას, რაც გამოაქვეყნა დღეს საპატრიარქომ. ამ ბნელ ადმინისტრაციას გადაჰყავს თვითგანადგურების რეჟიმში ქართული ეკლესია, რომელსაც უზარმაზარი ისტორია აქვს.
არავითარი ღვთისმგმობი გადაცემა აქ არ ყოფილა, აქ იყო საუბარი ცენზურაზე და ცენზურა სწორედ უმრავლესობისთვის მიუღებელი აზრების აკრძალვას ეხება, უმრავლესობისთვის მისაღებ აზრებს ცენზურა არასდროს კრძალავს. პირდაპირ მოუწოდებს საპატრიარქო ხელისუფლებას ცენზურასთან და მედიის შეზღუდვასთან დაკავშირებული კანონდმებლობა მიიღოს და ასევე საკუთარ თავს ეწინააღმდეგება საპატრიარქო იმავე განცხადებაში, როცა ამბობს, რომ ის პოლიტიკაში არ ერევა და სინამდვილეში ერევა, „რუსთავი 2-ის“ მაქსიმალურად შევიწროებას ცდილობს. ეს არის იგივე პოლიტიკური ამოცანა, რომელიც ამოძრავებს „ქართულ ოცნებას“-ამბობს ნიკა გვარამია.
მისი თქმით, ბოდიშის მოხდა მათ არ უჭირთ, მაგრამ ისინი ამ შემთხვევაში ბოდიშის მოხდას არ აპირებენ.
„ამ ვითარებაში სრულიად დარწმუნებული ვარ, რომ არც საბოდიშო არაფერი გვაქვს და არც შეცდომა არ დაგვიშვია. ძალიან სამწუხაროა თუ ვინმეს პირადი გრძნობები შეილახა, ეს არ ყოფილა მიზანი, მიუხედავად ამისა, ამის გამო ვწუხვარ, მაგრამ არავითარ ბოდიშს არ იმსახურებს ამ წერილის გამომქვეყნებელი ორგანიზაცია“-ამბობს ის „რუსთავი 2-თან“.
დღეს საქართველოს საპატრიარქომ სამაუწყებლო კომპანია „რუსთავი 2-ის" შესახებ განცხადება გამოაქვეყნა. საპატრიარქომ, 23 მაისს შემოქმედების თავისუფლებასთან დაკავშირებული გადაცემის გამო, სამღვდელოებას მოუწოდა შეწყვიტონ ყოველგვარი ურთიერთობა „რუსთავი 2-თან.
„არ მისცენ ინტერვიუ და არ მიიღონ მათ არცერთ გადაცემაში მონაწილეობა. სასურველია, იგივე გაითვალისწინონ მათ, ვისთვისაც ღირებულია ჩვენი ეკლესია და ჩვენი ფასეულობები." - ნათქვამია საპატრიარქოს განცხადებაში.
ასევე, განცხადება გაავრცელა საქართველოს ჟურნალისტური ეთიკის ქარტიის საბჭომ. ქარტია მედიის და ზოგადად გამოხატვის თავისუფლების წინააღმდეგ გადადგმულ ნაბიჯად აფასებს საქართველოს მართლმადიდებელი ეკლესიის საპატრიარქოს მიერ გაკეთებულ განცხადებას. სადაც ის სამღვდელოებას და ყველა მოქალაქეს, „ვისთვისაც ღირებულია ეკლესია”, “რუსთავი 2-სთვის” ბოიკოტის გამოცხადებისკენ მოუწოდებს.
.