თბილისის საკრებულომ 30 ხმით „ვარდების რევოლუციის მოედანს“ პირველი რესპუბლიკის სახელი მიანიჭა. პროტესტის ნიშნად ოპოზიციამ კენჭისყრაში მონაწილეობა არ მიიღო.
„ვარდების მოედნისთვის“ სახელის შეცვლის ინიციატივა სახელდების და სიმბოლიკის კომისიის თავმჯდომარემ, თინათინ ნიბლოშვილმა წამოაყენა. საკითხი პირველად საკრებულომ 2 მაისს განიხილა, რის შემდეგაც საჯარო განხილვისთვის 20 დღით საკრებულოს ვებგვერდზე გამოქვეყნდა ინიციატივა.
თინათინ ნიბლოშვილის თქმით, „ვარდების მოედნისთვის“ სახელის შეცვლის გადაწყვეტილება პირველი რესპუბლიკის გამოცხადებიდან 100 წლის იუბილეს უკავშირდება.
მოედნისთვის სახელის შეცვლის ინიციატივა საკრებულოში ოპოზიციამ გააპროტესტა. „ნაციონალური მოძრაობის“ წევრმა ნიკა ვაჩეიშვილმა ხელისუფლება ისტორიის წაშლის მცდელობაში დაადანაშაულა. მისი თქმით, ვარდების რევოლუცია საქართველოს და მისი თითოეული მოქალაქის მონაპოვარია და მოედნისთვის ამ სახელის გადარქმევა სწორედ ისტორიის წაშლის მცდელობაა.