გიორგი მარგველაშვილი საქართველოს პირველი რესპუბლიკის 100 წლისთავის აღსანიშნავად თბილისში ჩამოსულ ჟან კლოდ იუნკერს შეხვდა. მან ევროკომისიის პრეზიდენტთან ქვეყნის ევროინტეგრაციის პროცესსა და ევროკავშირთან დაახლოების გზაზე ისაუბრა.
გიორგი მარგველაშვილის შეფასებით, ჟან კლოდ იუნკერის პირველი ვიზიტი ევროკავშირის მიერ საქართველოს მხარდაჭერის მკაფიო გზავნილია. მათ ევროინტეგრაციის გზაზე საქართველოს მიერ მიღწეული შედეგები და ამ პროცესში ვიზალიბერალიზაციის მნიშვნელობაზე ისაუბრეს. პრეზიდენტის განცხადებით, ვიზალიბერალიზაცია ევროკავშირის ნდობისა და მხარდაჭერის ძლიერი პოლიტიკური გზავნილია, რასაც გაფრთხილება სჭირდება.
დღევანდელ შეხვედრაზე გიორგი მარგველაშვილი და ჟან კლოდ იუნკერს საქართველოს ოკუპირებულ რეგიონებში შექმნილ ვითარებაზე, არჩილ ტატუნაშვილის მკვლელობაზე, ადამიანის უფლებების დარღვევის ფაქტებზე და ბოლო პერიოდში გახშირებულ გატაცებებთან დაკავშირებით ესაუბრა.
პრეზიდენტმა ევროკავშირის სადამკვირვებლო მისიის და მისი მანდატის სრულად განხორციელების მნიშვნელობაზეც გაამახვილა ყურადღება. სადამკვირვებლო მისიას დეფაქტო ხელისუფლების წარმომადგენლები დღემდე არ აძლევენ მათი კონტროლის ქვეშ მყოფ ტერიტორიებზე შესვლის უფლებას. პრეზიდენტი მიიჩნევს, რომ ოკუპირებულ რეგიონებში უსაფრთხოების საერთაშორისო მექანიზმების შექმნა აუცილებელია.
