ზინედინ ზიდანი „მადრიდის რეალის“ მთავარი მწვრთნელი აღარ იქნება. ფრანგმა სპეცილისტმა განაცხადა, რომ თანამდებობის დატოვების გადაწყვეტილება მიიღო, რადგან გუნდს ახალი ხმა სჭირდება.
„ეს არის სწორი გადაწყვეტილება ყველასთვის. შეიძლება, ცოტა უცნაურად ჟღერს, მაგრამ ასეა. მე უნდა წავსულიყავი და ეს კარგია ყველასთვის - ფეხბურთელებისთვის, კლუბისთვის, ჩემთვის. გუნდმა მოგება უნდა განაგრძოს, ამიტომ სამი წლის შემდეგ მას ცვლილება სჭირდებოდა, სხვა ხმა, სხვა მიდგომა და მუშაობის განსხვავებული სტილი“, - განაცხადა ზიდანმა.
ზიდანის თქმით, მას „რეალი“ ძალიან უყვარს და ამ გუნდის გაწვრთნა მისი ოცნება იყო. „მაგრამ ყველაფერი იცვლება და ეს გადაწყვეტილებაც ამიტომ მივიღე“ - დასძენს ზიდანი.
ზინედინ ზიდანი „რეალის“ მწვრთნელად 2016 წლის იანვარში დაინიშნა, მას შემდეგ, რაც კლუბიდან რაფაელ ბენიტესი გაათავისუფლეს. მას შემდეგ ფრანგმა სპეცილისტმა „რეალს“ ჩემპიონთა ლიგა 3-ჯერ მოაგებინა.