ხორავას ქუჩაზე მოკლული დავით სარალიძის მამა, ზაზა სარალძე, რომელიც საპროტესტო აქციებს ხელმძღვანელობდა, პრემიერ-მინისტრის თანამდებობიდან გიორგი კვირიკაშვილის გადადგომას ეხმაურება.
„ერთხელ მართალია, მოვითხოვე კვირიკაშვილის გადადგომა, მგონი პირველი აქციის დროს, ან როდესაც თავად მოვიდა აქციაზე, მაგრამ, მას შემდეგ აღარ გამიმახვილებია ყურადღება ამაზე. იმიტომ, რომ როდესაც კვირიკაშვილს პირადად შევხვდი, დავრწმუნდი, რომ ამ კაცმა ამ საქმესთან დაკავშირებით არაფერი არ იცოდა", - აცხადებს ზაზა სარალძე და განაგრძობს, - „მე კონკრეტული პრეტენზიები იმ ადამიანებთან მაქვს, ვინც ამ საქმის შესახებ ყველაფერი იცის და არანაირ რეაგირებას არ ახდენს. ან თუნდაც მათტან, ვინც მფარველების მფარველად მოგვევლინებიან - წულუკიანი შოთაძის მფარველად, რომ მოგვევლინა: შოთაძე ყოველგვარი პასუხისმგებლობის გარეშე, ტაშით გააცილა. რაც შეეხება გახარიას, გუშინაც იყო დარღვევები, 2-3 ადამიანი უგზო-უკვლოდ გაიტაცეს".
გიორგი კვირიკაშვილმა გადადგომის მიზეზების შესახებ საუბრისას „ქართული ოცნების" თავმჯდომარე ბიძინა ივანიშვილთა აზრთა სხვადასხვაობაზე გააკეთა აქცენტი.
