თბილისში მერია ბეჰემოტ ბეგის ძეგლის დადგმას აპირებს. ამის შესახებ დედაქალაქის მერის მოადგილემ სოფიო ხუნწარიამ 13 ივნისის ხსოვისადმი მიძღვნილ ღონისძიებაზე განაცხადა. ხუნწარიას თქმით, ბეგი წყალდიდობის შემდეგ მთელმა მსოფლიომ გაიცნო და ამ დღის ერთგვარ სიმბოლოდ იქცა.
„13 ივნისის ტრაგედიის მეორე დღეს, მთელი მსოფლიო საუბრობდა ქუჩაში მოსეირნე ბეჰემოტზე, რომელიც სტიქიას გადაურჩა. ბეგი ერთგვარ სიმბოლოდ იქცა და დედაქალაქის მერიამ გადაწყვიტა, რომ თბილისში დაიდგას მისი ძეგლი“, - თქვა ხუნწარიამ.
თბილისის მერიის ინფორმაციით, ბეჰემოტის ძეგლის ავტორი ნიკუშა შენგელაია, ხოლო შემსრულებელი ლევან ვარდოსანიძე იქნება.
ხუნწარიას თქმით, თბილისის მერია 2019 წლიდან მოხალისეებისთვის სპეციალურ ჯილდოსაც დააწესებს.
„2019 წლიდან ყოველ 13 ივნისს, იმ მოხალისეების სახელით, რომლებიც სტიქიას შიშველი ხელებით ებრძოდა, სხვა მოხალისეებს, რომლებიც თბილისზე მზრუნველნი იქნებიან, ჯილდო გადაეცემათ“, - განაცხადა 13 ივნისის ხსოვნისადმი მიძღვნილ ღონისძიებაზე დედაქალაქის მერის მოადგილემ სოფიო ხუნწარიამ.