„დაველოდოთ მოვლენების განვითარებას, ყოველთვის ვიყავი და ვარ „ქართული ოცნების“ გუნდური მოთამაშე, – ამის შესახებ ჟურნალისტებს საქართველოს იუსტიციის მინისტრის მოვალეობის შემსრულებელმა, თეა წულუკიანმა განაცხადა. ინფორმაციას 1tv ავრცელებს.
მისი თქმით, მან არ იცის, თუ ვინ იქნება მომავალი პრემიერ-მინისტრი, რადგან ის არ დასახელებულა და კარგი იქნება, თუ ყველა, მათ შორის პრეზიდენტიც, მშვიდად შეხვდება ამ პროცედურებს.
„მე არ შეიძლება ვიცოდე, ვინ იქნება მომავალში პრემიერ-მინისტრი. ის კანდიდატი, რომელიც ჯერ არ დასახელებულა, როგორ დააკომპლექტებს კაბინეტს. ამას აქვს თავისი პროცედურა. ასევე, წინასწარი ინფორმაციებიც არ მაქვს. კარგი იქნება, თუ ჩვენ ყველანი, მათ შორის საქართველოს პრეზიდენტიც, მშვიდად შევხვდებით იმას, რომ ეს არის პროცედურა. ქვეყანას მართავს „ქართული ოცნების“ მმართველი პარტია და პრემიერისა და მინისტრის ცვლილებით არ იცვლება პოლიტიკური კურსი არც შიგნით და არც ქვეყნის გარეთ“, – განაცხადა თეა წულუკიანმა.
პრემიერ-მინისტრმა, გიორგი კვირიკაშვილმა თანამდებობა გუშინ დატოვა.
