გუშინ რუსეთში მსოფლიოს საფეხბურთო ჩემპიონატი დაიწყო და პირველი თამაშიც გაიმართა მასპინძელ ქვეყანასა და საუდის არაბეთს შორის.

დღეიდან კი მუნდიალზე გუნდები სრული დატვირთვით ჩაებმებიან და ჯგუფური ეტაპის განმავლობაში ყოველდღიურად 3-3 მატჩი გაიმართება. მსოფლიო ჩემპიონატი გამორჩეული ტურნირია და თითქმის ყოველდღე ერთი თამაში მაინც გულშემატკივართა დიდ ინტერესს იწვევს.

მუნდიალის მეორე დღეს, თბილისის დროით, 16:00 საათზე ურგვაისა და ეგვიპტის დაპირისპირება გახსნის. სამხრეთ ამერიკელები ჯგუფის მთავარი ფავორიტები არიან, მათთან ერთად კი მერვედფინალში, სავარაუდოდ, რუსეთი ან ეგვიპტე გავა.

ეგვიპტელების მთავარი იმედი მოჰამედ სალაჰია, რომელიც გასულ სეზონში ევროპის წამყვან ჩემპიონატებში ერთ-ერთი საუკეთესო მოთამაშე იყო. ურგვაისთან შეხვედრაშიც ეგვიპტელი ფანები სწორედ სალაჰის გამოჩენას ელოდებიან. ფორვარდმა ჩემპიონთა ლიგის ფინალში ტრავმა მიიღო და აქამდე უცნობია, შეძლებს თუ არა დღეს თამაშს, თუნდაც შეცვლაზე შემოსვლით. 

დღის მეორე მატჩი იქნება მაროკო-ირანი. ორივე ნაკრები B ჯგუფის აუტსაიდერია და მოსალოდნელია, რომ ამ თამაშში დამარცხებული ჯგუფშიც ბოლო ადგილზე გავა. თამაში თბილისის დროით 19:00 საათზე იწყება.

მუნდიალის მეორე დღეს პირინეული დაპირისპირება დააგვირგვინებს. B ჯგუფის ფავორიტები ესპანეთი და პორტუგალია ერთმანეთს პირველივე ტურში ხვდებიან, თანაც ესპანეთის ნაკრებს ახალი მწვრთნელი სულ ერთი დღეა, რაც ჰყავს.

ესპანელთა ყოფილი მწვრთნელი იულიენ ლოპეტეგი „რეალის“ მწვრთნელი ხდება, ამ ინფორმაციამ ესპანეთის ფეხბურთის ფედერაციის უკმაყოფილება და მსოფლიო ჩემპიონატის დაწყების წინ მისი დათხოვნა გამოიწვია.

დღის ცენტრალური შეხვედრა ესპანეთსა და პორტუგალიას შორის თბილისის დროით, 22:00 საათზე დაიწყება.