კომიტეტის გაერთიანებულ სხდომაზე, სადაც მინისტრობის კანდიდატებს უსმენენ, თამაზ ახობაძესა და ანა სუბელიანს შეკითხვის დასმის უფლებას არ აძლევენ. მათ შეკითხვები იუსტიციის მინისტრობის კანდიდატთან, თეა წულუკიანთან აქვთ, ასევე, შს მინისტრობის კანდიდატთან, გიორგი გახარიასთან.

როგორც იურიდიული კომიტეტის თავმჯდომარემ, ეკა ბესელიამ განმარტა, ახობაძესა და სუბელიანს აქვთ შესაძლებლობა, რომ კომიტეტის სხდომას დაესწრონ, რაც შეეხება შეკითხვის დასმას, დროის ლიმიტის გამო, მათ ამის უფლებას ვერ მისცემს. ბესელიას თქმით, დროის სიმცირის გამო, შეკითხვის შესაძლებლობა მხოლოდ კომიტეტის წევრებს ექნებათ.

როგორც საპარლამენტო უმცირესობის წევრმა, ელენე ხოშტარიამ განაცხადა, კომიტეტზე დასწრების არსი მდგომარეობს იმაში, რომ ადამიანებს შეკითხვის დასმის შესაძლებლობა ჰქონდეთ.

მისივე თქმით, თუ დრო არის პრობლემა, მაშინ ის თავის 2 წუთს დაუთმობს ამ ადამიანებს.

როგორც ბესელიამ მას უპასუხა, რეგლამენტი „ასეთი ჩანაცვლების შესაძლებლობას არ ითვალისწინებს“.

თამაზ ახობაძის წერილი პარლამენტის სხოდმაზე „ევროპული საქართველოს" წევრმა ელენე ხოშტარიამ წაიკითხა.

2014 წელს ანა სუბელიანი და თამაზ ახობაძე იუსტიციის სამინისტროს დანაშაულის პრევენციის ცენტრიდან გაათავისუფლეს. დათხოვნა ოფიციალურად რეორგანიზაციის მექანიზმის გამოყენებით მოხდა. თუმცა, მათი თქმით, რეალური მიზეზი თანამშრომლების მიერ დანაშაულის პრევენციის ცენტრის ხელმძღვანელის გათავისუფლებასთან დაკავშირებით სოციალურ ქსელში განთავსებული პოსტები იყო.

მედიაციის სახლის მენეჯერის, ანა სუბელიანისა, და განრიდებისა და მედიაციის პროგრამის მენეჯერის, თამაზ ახობაძის, ინიციატივით საქმის წარმოება სასამართლოში დაიწყო - მომჩივანებმა საქმე იუსტიციის მინისტრის წინააღმდეგ სამივე ინსტანციაში მოიგეს.

სააპელაციო სასამართლომ 2017 წლის 9 მარტს სრულად დააკმაყოფილა  ანა სუბელიანისა და თამაზ ახობაძის სარჩელი. იუსტიციის სამინისტროს დანაშაულის პრევენციის ცენტრს დაზარალებულთათვის იძულებითი განაცდურის ანაზღაურება დაეკისრა. სასამართლომ უკანანოდ და ბათილად ცნო სამსახურიდან გათავისუფლების ბრძანებები.

2017 წლის დეკემბერში აღსრულების ეროვნულ ბიუროს ოფიციალური სააღსრულებლო ფურცელი ჩაბარდა, თუმცა, გადაწყვეტილება აღსრულებული დღემდე არ არის.