იუსტიციის მინიტრობის კანდიდატმა, თეა წულუკიანმა ტელეკომპანია „იმედთან“ ინტერვიუში ხორავას ქუჩის საქმეზე ისაუბრა.
ჟურნალისტის შეკითხვაზე, რატომ მოხდა, რომ ძიება თავიდან დაიწყო და ამ საქმეს მოჰყვა მთავარი პროკურორის, ირაკლი შოთაძის გადადგომა, თეა წულუკიანმა უპასუხა, რომ ძიება თავიდან არ დაწყებულა და როდესაც ამის შესახებ ყოფილმა პრემიერმა კვირიკაშვილმა განაცხადა, მან შეცდომა დაუშვა.
„მე ამას პირველად ვამბობ ღია ეთერში, რომ, როდესაც პრემიერმა კვირიკაშვილმა განცხადება გააკეთა აქციიდან დაბრუნების შემდეგ, მან დაუშვა შეცდომა. მე ამას ღიად ვამბობ, სამწუხაროა, რომ ამის თქმა მიწევს, მაგრამ ეს იყო ფაქტობრივი შეცდომა. ძიება არ დაწყებულა თავიდან. თქვენ შეგიძლიათ ყოფილ პრემიერს ჰკითხოთ და ის ამას დაგიდასტურებთ, რომ ეს იყო ფაქტობრივი შეცდომა.
როდესაც საქმეზე დადგა ის მტკიცებულებები იმ ვადაში, რა ვადასაც ითვალისწინებს, დაახლოებით 40-დღიან ვადას, არასრულწლოვანთა მართლმსაჯულების კოდექსი, რა დონეზეც იყო მზად მტკიცებულებების საქმე რამდენიმე პირის ნაწილში, ის წარიმართა სასამართლოში და საქმის დანარჩენ ნაწილებზე, როგორც დღეს ბატონმა გახარიამაც დაადასტურა, გამოიყო გამოძიებიდან დანარჩენი ეპიზოდები თუ კითხვის ნიშნები და მათზე გამოძიება გაგრძელდა. გამოძიება პირველი დღიდან დღემდე მიმდინარეობდა შსს-ში და არა პროკურატურაში და პროკურატურას პირველი დღიდან დღემდე ჰქონდა შსს-ს გამომძიებლებზე საპროცესო ხელმძრვანელობის ფუნქცია, ეს არის რეალობა,“ - განაცხადა თეა წულუკიანმა.
