პარლამენტის რიგგარეშე სხდომაზე, ამ წუთებში, მთავრობისთვის ნდობის გამოცხადების საკითხზე მსჯელობენ.
საკანონმდებლო ორგანოში სიტყვით გამოდის პრემიერ-მინისტრობის კანდიდატი მამუკა ბახტაძე, რომელიც პარლამენტს მინისტრთა კაბინეტის შემადგენლობასა და სამთავრობო პროგრამას წარუდგენს. ბახტაძის თქმით, ამჯერად მთავრობის შემადგენლობა მხოლოდ ფორმალურად არის წარმოდგენილი და გუნდს, რომელიც პროგრამის შესრულებაზე აიღებს პასუხისმგებლობას, 2-3 კვირაში წარმოადგენს.
დროებით წარმოდგენილ შემადგენლობაში პრემიერობის კანდიდატის გარდა, სამი საკადრო ცვლილებაა. ყველა შემთხვევაში მინისტრის თანამდებობაზე მოადგილეები განიხილებიან.
საგარეო საქმეთა მინისტრობის კანდიდატად დავით ზალკალიანის კანდიდატურაა დასახელებული; ფინანსთა მინისტრის თანამდებობაზე - ნიკოლოზ გაგუა; ეკონომიკისა და მდგრადი განვითარების მინისტრად - გიორგი ჩერქეზიშვილი.
დღეს კენჭისყრამდე მამუკა ბახტაძე პარლამენტს სამთავრობო პროგრამას წარუდგენს, რასაც კომიტეტების, ფრაქციების, უმრავლესობა-უმცირესობის სიტყვით გამოსვლა და კითხვა-პასუხი მოჰყვება.