„ღამის ეკონომიკის“  პროექტის მენეჯერის, სერგი გვარჯალაძის იდეაზე, რომელიც ქუჩის მუსიკოსების რეგულირებას ეხება, საპარლამენტო უმრავლესობის წევრი და მუსიკოსი ზაზა ხუციშვილი ამბობს, რომ სწორად არ მიაჩნია. 

გვარჯალაძე: ზოგიერთი ქუჩის მუსიკოსი ვნებს მოქალაქეების ყურს, ეს საკითხი მოსაწესრიგებელია

„არ მგონია, სწორი იყო,ს შეუფასო ქუჩის მუსიკოსს, ვინ უკეთ მღერის და ვინ ნაკლებად. ქუჩაში როცა გამოდის, თუ კარგად მღერის, გაჩერდება ადამიანი და მოუსმენს, თუ ცუდად მღერის, არ მოუსმენს.

სხვა ქვეყნებში, მე რა ინფორმაციაც მაქვს, დროს ეხება რეგულირება, ანუ არ შეძლება, ერთი ადამიანი კარგ ადგილზე იდგეს კვირაობით და ის სივრცე მიისაკუთროს, ამიტომ ერთ ადამიანს ზოგ ქვეყანაში დრო აქვს შეზღუდული. მაგალითად, თუ არის ცენტრალური ადგილი ერთ მუსიკოსს შეუძლია, დაახლოებით 40 წუთი იდგეს. დილიდან საღამომდე ვერ იქნება, მერე სხვასაც უნდა დაუთმოს ადგილი.

ხარისხს, მე მგონი, არავის უმოწმებენ. ეს ჩვეულებრივი ამბავია. იდეის ავტორს ვთხოვოთ ახსნა. ჩემი აზრით, არ არის სწორი ხარისხის შემოწმება", - უთხრა „ლიბერალს" ზაზა ხუციშვილმა.

სერგი გვარჯალაძის თქმით, ალბათ, ქუჩის მუსიკოსებს დასჭირდებათ დოკუმენტი, რომელიც მათ ქუჩაში დაკვრის უფლებას მისცემს: „ძალიან ნიჭიერი მუსიკოსები დგანან ქუჩაში, მაგრამ არიან ადამიანები, რომლებიც მუსიკოსები არ არიან და ეს ვნებს არა მხოლოდ ჩვენი მოქალაქეების ყურს, არამედ ტურისტებზე არასასიამოვნო შთაბეჭდილებას ახდენს. ასე რომ, ვფიქრობ, ესეც მოსაწესრიგებელია".