„თეთრი ხმაურის მოძრაობა“ ვიდეოს აქვეყნებს, რომელშიც, ორგანიზაციის განცხადებით, ჩანს, როგორ ითხოვს შსს ჩხრეკას მათთან შეთანხმების გარეშე, თანაც არასწორად გაცემული განჩინების საფუძველზე.
„თეთრი ხმაურის მოძრაობის“ განცხადებით, უწყების წარმომადგენლებმა მედიასთან იცრუეს, როცა თქვეს, რომ მათ დოკუმენტები ურთიერთშეთანხმების საფუძველზე გაჰქონდათ.
„შსს-მ მედიას განუცხადა, რომ ოფისში შესვლა არა ჩხრეკას, არამედ ურთიერთშეთანხმების საფუძველზე დოკუმენტების გადაცემას გულისხმობდა. იხილეთ ვიდეო, რომელზეც ჩანს, რომ შსს ჩხრეკას ითხოვს და ამას არასწორად გაცემული განჩინების საფუძველზე აკეთებს. ჩხრეკაზე განჩინება გაცემულია 24 მაისს, როდესაც შსს-მ კლუბის გახსნის გადაწყვეტილება მიიღო“, - წერს „თეთრი ხმაურის მოძრაობა“ Facebook-ზე.
„ბასიანის“ დამფუძნებელმა ზვიად გელბახიანმა Facebook-ზე დაწერა, რომ შსს მათ ოფისში შევიდა და ჩხრეკა დაიწყო. შინაგან საქმეთა სამინიტროში ლიბერალს განუცხადეს, რომ პოლიციის თანამშრომლები მართლაც მივიდნენ „ბასიანზე“, თუმცა „ჩხრეკა არ მიმდინარეობს, ორივე მხარის შეთანხმებით გარკვეული დოკუმენტები მიაქვთ“, - თქვეს უწყებაში.
