გუშინ თურქეთში გამართულ ვადამდელ საპრეზიდენტო და საპარლამენტო არჩევნებში რეჯეფ თაიფ ერდოღანმა და მისმა პარტიამ გაიმარჯვა. არჩევნებზე ერდოღანმა ხმების 53% მიიღო, ხოლო მისმა ოპონენტმა მუჰარემ ინჯემ - 31%.  

BBC-ის ცნობით, ოპოზიცია ჯერ ისევ არ აღიარებს შედეგებს, თუმცა აცხადებენ, რომ ისინი გააგრძელებენ დემოკრატიულ ბრძოლას „შედეგების მიუხედავად“. 

რეჯეფ თაიფ ერდოღანმა მხარდამჭერებს 03:00 საათზე პარტიის ოფისის აივნიდან მიმართა და გამარჯვება მიულოცა. „ამ არჩევნებში გამარჯვებულია ყველა თურქეთის მოქალაქე“, - განაცხადა მან. 

გასულ წელს თურქეთში გაიმართა რეფერენდუმი, რომელიც კონსტიტუციის შეცვლას და თურქეთს საპარლამენტო რესპუბლიკიდან საპრეზიდენტო სახელმწიფოდ გადაქცევას ითვალისწინებდა. გამარჯვების შემდეგ კი მისი უფლებამოსილებები გაიზარდა.

„ამ არჩევნების დამსახურებით, თურქეთი აწყობს დემოკრატიულ რევოლუციას“, - აცხადებდა ერდოღანი.

პოლიტოლოგები კი წერდნენ, რომ, თუ ერდოღანი გაიმარჯვებდა, მისი უფლებამოსილებები უფრო გაძლიერდებოდა და ეს ცუდად იმოქმედებდა დემოკრატიულ პროცესებზე ქვეყანაში. 

საპრეზიდენტო და საპარალამენტო არჩევნები თურქეთში 2019 წლის ნოემბერში უნდა ჩატარებულიყო, თუმცა ერდოღანმა აპრილში განაცხადა, რომ ის 24 ივნისს გაიმართებოდა.  

რეჯეფ თაიფ ერდორანი 2003 წლიდან 2014 წლამდე თურქეთის პრემიერ-მინისტრი, ხოლო 2014 წლიდან თურქეთის პრეზიდენტი იყო.