კამპანია „კაცები ზრუნავენ“ Emerging Europe Awords-ის გამარჯვებული გახდა. კამპანიამ ჯილდო ნომინაციაში „წლის საუკეთესო ინიციატივა გენდერული თანასწორობის მისაღწევად“ მიიღო.
დაჯილდოებას რეკონსტრუქციისა და განვითარების ევროპული ბანკი (EBRD) ყოველწლიურად, ევროპის მასშტაბით ატარებს და სხვადასხვა სფეროს პროფესიონალებისგან დაკომპლექტებული სპეციალური ჟიური გამარჯვებულებს ათ ნომინაციაში აჯილდოებს.
დაჯილდოების მიზანია, გამოავლინოს და წაახალისოს ცენტრალური და აღმოსავლეთ ევროპის ის ორგანიზაციები, რომელთა გამოცდილება და პრაქტიკა რეგიონში მნიშვნელოვანი და გასათვალისწინებელია.
ორგანიზაციები ჯილდოვდებიან შემდეგ ნომინაციებში - გლობალური ბაზრის ჩემპიონი, წლის საუკეთესო კვლევა და განვითარება, საზოგადოების განვითარებისკენ მიმართული საუკეთესო პროექტი, სოციალური გავლენის მქონე წლის საუკეთესო პროექტი, წლის საუკეთესო ტურისტული კამპანია, ახალგაზრდების გაძლიერებაზე მიმართული წლის საუკეთესო ინიციატივა, საუკეთესო კომპანია, რომელმაც ყველაზე დიდი ეროვნული ინვესტიცია განახორციელა, წლის საუკეთესო ინიციატივა თანასწორობის მისაღწევად. სწორედ ამ ნომინაციაში გადასცეს კამპანიას “კაცები ზრუნავენ” პირველი ადგილი და სპეციალური ჯილდო ლონდონში, EBRD -ის ცენტრალურ ოფისში, 22 ივნისს გამართულ დაჯილდოებაზე.
კამპანია „კაცები ზრუნავენ“ საქართველოში 2016 წელს, გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაციის We Care-ის ინიციატივით დაიწყო. კამპანიის მიზანია წაახალისოს მამაკაცების, როგორც არამოძალადე და მზრუნველი მამების და მეუღლეების ჩართულობა ოჯახების ჯანმრთელობისა და კეთილდღეობისათვის, რათა მამაკაცებმა მეტად დაუჭირონ მხარი გენდერულ თანასწორობას, და ამ გზით - ქალების სოციალურ და ეკონომიურ მონაწილეობას და საზოგადოების გაძლიერებას.