თბილისის საქალაქო სასამართლომ დეპუტატ ვალერი გელაშვილის ცემის საქმეზე საქართველოს ყოფილი პრეზიდენტი, მიხეილ სააკაშვილი დამნაშავედ ცნო. მოსამართლე შორენა გუნცაძემ განაჩენი დღეს გამოიტანა.
მოსამართლემ ყოფილი პრეზიდენტი ორივე ბრალში - ძალადობასა და სამსახურებრივი უფლებამოსილების გადამეტებაში, ასევე ჯანმრთელობის განზრახ მძიმე დაზიანების ორგანიზებაში დამნაშავედ ცნო და სასჯელის სახით, საბოლოოდ 6 წლით თავისუფლების აღკვეთა შეუფარდა. მიხეილ სააკაშვილს ასევე ჩამოერთვა 2 წლითა და 3 თვით თანამდებობის დაკავების უფლებაც.
მიხეილ სააკაშვილს ბრალად ძალადობით სამსახურებრივი უფლებამოსილების გადამეტება და ჯანმრთელობის განზრახ მძიმე დაზიანების ორგანიზება ედება. საუბარია 2005 წელს დეპუტატ ვალერი გელაშვილზე მომხდარ შეიარაღებულ თავდასხმასა და მისი ცემის ფაქტზე.
ამ საქმეზე სასამართლომ გამამტყუნებელი განაჩენი უკვე გამოუტანა შინაგან საქმეთა ყოფილ მინისტრს, ვანო მერაბიშვილს, სოდ-ის ყოფილ უფროსს, ერეკლე კოდუასა და ამავე დეპარტამენტის სამმართველოს ყოფილ უფროსს, გია სირაძეს. მერაბიშვილს 6 წლითა და 9 თვით, ერეკლე კოდუასა და გია სირაძეს კი 9 წლით თავისუფლების აღკვეთა მიესაჯათ.