საზოგადოებრივი მაუწყებლის სამეურვეო საბჭომ მაუწყებლის 2018-2021 წლების პროგრამულ პრიორიტეტებზე იმსჯელა.
შეხვედრას არასამთავრობო ორგანიზაციის წარმომადგენლებიც ესწრებოდნენ. შეხვედრაზე ხმაური მოჰყვა უმცირესობების შესახებ პროგრამული პრიორიტეტების განხილვას.
LIVE ► დაპირისპირება საზოგადოებრივი მაუწყებლის პროგრამული პრიორიტეტების განხილვაზე
საზოგადოებრივი მაუწყებლის სამეურვეო საბჭოს წევრი ნინია კაკაბაძე „ლიბერალთან“ საუბარში ჰყვება, რომ პროგრამული პრიორიტეტების განხილვისას ერთ-ერთი ყველაზე ხმაურიანი აღმოჩნდა პუნქტი, რომელიც ადამიანის უფლებებს ეხებოდა.
„ჩანაწერში იყო ლგბტ თემი, ემიგრანტების თემა და ქალთა უფლებები. ჩემი ინიციატივა იყო ამ ჩამონათვალის არსებობა. ამას ვხსნი იმით, რომ დღეს ამ ჯგუფების უფლებები ყველაზე მეტად არის დარღვეული და მათ სჭირდებათ ყველაზე მეტად მხარდაჭერა. საზოგადოებრივი მაუწყებელი არის სწორედ ის მედიასაშუალება, რომელიც სწორედ საზოგადოებრივ საწყისებზე დგას და პირველ რიგში, მისი ვალდებულებაა საგანმანათლებლო ხასიათის გადაცემების წარმოება. ვფიქრობ, რომ ამ მიმართულებით ჩვენ მენეჯმენტისთვის და ტელევიზიისთვის ძალიან კონკრეტული მითითება უნდა მიგვეცა. ამ მიმართულებით ყველაზე მეტად უნდა იმუშაონ, რადგან ეს არის დღეს ყველაზე მტკივნეული და კრიტიკული საკითხები ჩვენ ქვეყანაში", - ამბობს ნინია კაკაბაძე.