საქართველოს ჟურნალისტური ეთიკის ქარტიის აღმასრულებელი დირექტორის, ნატა ძველიშვილის თქმით, საზმაუს პროგრამული პრიორიტეტების დოკუმენტს აკლია დასაბუთება და ჩნდება ეჭვი, რომ დოკუმენტი უმოქმედო იქნება.
„საერთოდ ვერ ვხედავ, საიდან მოვიდა ეს პრიორიტეტები. არ ჩატარებულა კვლევა, როგორც გამოჩნდა. რჩება შთაბეჭდილება, რომ 9 წევრი საბჭოში დაჯდა და გადაწყვიტა, რა უნდა იყოს საზოგადოებრივი მაუწყებლის პრიორიტეტები მომდევნო სამ წელიწადში“, - მიიჩნევს ძველიშვილი.
ნატა ძველიშვილის თქმით, პრობლემაა ისიც, რომ დოკუმენტში არ ჩანს პლატფორმების პრიორიტეტებიც. მაგალითად, რომელი გადაცემისთვის არის პრიორიტეტული პირველი არხი, მეორე არხი, რადიო, სოციალური ქსელი თუ ვებგვერდი.
„ეს დოკუმენტი არის ძალიან ზოგადი, რომელშიც ნებისმიერი თემა, რომელსაც დაასახელებ, შეუძლიათ თქვან, რომ აქ არის ასახული, მაგრამ კონკრეტულად როგორ უნდა იმუშაოს საზ. მაუწყებელმა მომდევნო სამ წელიწადში, საერთოდ არ იკითხება.
დოკუმენტს არ აქვს შეფასების კრიტერიუმები. რაც აქვს თანდართული - აბსოლუტურად გაუგებარია. მაგალითად, არხის რეიტინგის ზრდამ როგორ უნდა შეაფასოს შესრულდა თუ არა კონკრეტული პრიორიტეტი. ეს აჩენს ეჭვს, რომ ეს დოკუმენტიც ისეთივე უმოქმედო იქნება, როგორი უმოქმედოც იყო წინა პრიორიტეტები“, - ამბობს ჟურნალისტური ეთიკის ქარტიის აღმასრულებელი დირექტორი.
საზოგადოებრივი მაუწყებლის სამეურვეო საბჭომ მაუწყებლის 2018-2021 წლების პროგრამულ პრიორიტეტებზე დღეს იმსჯელა. შეხვედრაზე უმცირესობების შესახებ პროგრამული პრიორიტეტების განხილვას ხმაურიც მოჰყვა.
რა გახდა საზმაუს პრიორიტეტების განხილვაზე დაპირისპირების მიზეზი - კაკაბაძე შეხვედრის შესახებ
