საქართველოს პრემიერ-მინისტრი მამუკა ბახტაძე, სტიქიის ზონაში, სოფელ ჭუბერში ჩავიდა. პრემიერ-მინისტრი მიმდინარე სამუშაოებსა და არსებულ ვითარებას ადგილზე ეცნობა.
პრემიერ-მინისტრის, მამუკა ბახტაძის ვერტმფრენი დილით ჭუბერში ამინდის გაუარესების გამო ვერ დაჯდა. ამიტომ, დღეს პრემიერი სტიქიის ზონაში ზუგდიდიდან რეგიონული განვითარებისა და ინფრასტრუქტურის მინისტრთან მაია ცქიტიშვილთან და გარემოს დაცვისა და სოფლის მეურნეობის მინისტრ ლევან დავითაშვილთან ერთად მანქანით ჩავიდა.
გუშინ მესტიის რაიონში, ჭუბერში, სადაც ნენსკრაჰესი შენდება, მთის ნაწილი ჩამოიშალა, რამაც მდინარე ნენსკრას ადიდება გამოიწვია. მდინარე კალაპოტიდან გადმოვიდა, დაიტბორა მიმდებარე ტერიტორია და სოფლებს შორის დამაკავშირებელი გზები. მდინარემ წაიღო რამდენიმე სახლი, თუმცა მსხვერპლი არ არის. რამდენიმე თემი გარესამყაროსაა მოწყვეტილი.
