ხადის ხეობაში მომხდარი მკვლელობის საქმის გამოძიებაში საქართველოს დახმარებას FBI უწევს, - ამის შესახებ „ლიბერალს“ საქართველოში ამერიკის შეერთებული შტატების საელჩოში განუცხადეს.
ცოლ-ქმრისა და 4 წლის ბავშვის მკვლელობაში ბრალდებულ მწყემსს, მალხაზ კობაურს წინასწარი პატიმრობა შეეფარდა.
ბრალდებულის თქმით, სმიტების ოჯახის წევრები მას არ მოუკლავს და „იქ ორი უცხოელი მამაკაცი იყო“.
„ისინი მე არ დამიხოცავს. ორი უცხოელი მამაკაცი იყო და იმათ დახოცეს. მე დამემუქრნენ, რომ ოჯახს ამომიწყვეტდნენ“, - განაცხადა კობაურმა.
პროკურორ დავით ყაზარაშვილის თქმით, მალხაზ კობაურმა რაიან მაიკლ სმიტის მკვლელობა მას შემდეგ გადაწყვიტა, რაც სმიტმა იარაღის დაუდევრად გამოყენების გამო შენიშვნა მისცა. როგორც პროკურორმა აღნიშნა, კობაურმა ჯერ მაიკლ სმიტი მოკლა, შემდეგ მის ცოლს დაედევნა მოსაკლავად, ბოლოს კი თავის არეში მათ მცირეწლოვან შვილს ესროლა.
