ლენტეხში, სოფელ ზესხოში მეხანძრე-მაშველები კვლავ ხანძრის ლოკალიზებას ცდილობენ. საგანგებო სიტუაციების მართვის სამსახურის ინფორმაციით, ცეცხლის სამი დამოუკიდებელი კერაა, რომლის ქრობის პროცესი მთელი ღამის განმავლობაში მიმდინარეობდა.
როგორც „ლიბერალს“ უწყებაში განუცხადეს, ურთულესი რელიეფის გამო ადგილზე ტექნიკის შეყვანა გამორიცხულია. ამიტომ, ცოცხალი ძალის გარდა, ხანძრის ლოკალიზების პროცესში ჩართულია შსს-ს სასაზღვრო პოლიციის ვერტმფრენი.
„გუშინ გვყავდა 120 მეხანძრე-მაშველი, ახლა 200-მდე გაიზარდა მათი რაოდენობა. გარდა ადგილობრივი მეხანძრე-მაშველებისა, ისინი მობილიზებული გვყავს თბილისიდან, იმერეთიდან და შიდა ქართლიდან“,- განუცხადეს „ლიბერალს“ საგანგებო სიტუაციების მართვის სამსახურში.