ფრაქცია „ნაციონალური მოძრაობის" წევრი ნიკა მელია შს მინისტრ გიორგი გახარიას შეკითხვით მიმართავს - რატომ გაუშვა პატრულმა ინტერპოლით ძებნილი პირი.

საუბარია ყაზახეთის რესპუბლიკის მოქალაქეზე, რომელიც, შსს-ს ინფორმაციით, მკვლელობისა და ყაჩაღობის ბრალდებით, ინტერპოლის წითელი ცირკულარით იძებნებოდა. უწყების წარმომადგენლებმა ის 10 ივნისს რუსთაველის გამზირზე მიმდინარე აქციაზე დააკავეს, თუმცა მანამდე, 3 კვირით ადრე, ყაზახეთის მოქალაქე პატრულმა გააჩერა, დააჯარიმა და გაუშვა.

შსს-მ რუსთაველზე ინტერპოლით ძებნილი, მკვლელობისა და ყაჩაღობისთვის ბრალდებული დააკავა

გიორგი გახარიას განმარტებით, პატრულის ბაზაში ინტერპოლით ძებნილის ბაზა ინტეგრირებული არ იყო.

„პატრულმა ოფიცერმა როცა გააჩერა, მის მობილურ ბაზაში ინტერპოლით ძებნილის ბაზა არ იყო ინტეგრირებული. დღესაც არ არის, ამას ახლა ვასწორებთ. ამიტომ გაუშვა“, - განმარტავს გახარია. 

როგორ აღმოჩნდა 2013 წელს დაკავებული, ინტერპოლით ძებნილი პირი აქციაზე - პროკურატურის პასუხი

1982 წელს დაბადებული ყაზახეთის მოქალაქე ბესლან კაიმის ძე ლორსანოვი ქართველმა სამართალდამცავებმა 2013 წელსაც დააკავეს. ამის შესახებ ინფორმაცია შსს-ს ვებგვერდზე ამ დრომდე იძებნება.