გენერალური პროკურორობის კანდიდატის, შალვა თადუმაძის თქმით, მინდელის შახტში მომხდარი შემთხვევის გამოძიება უშუალოდ პროკურატურის კომპეტენციაში არ შედის, მაგრამ იმ შემთხვევაში, თუ გამოძიებით ვინმეს დანაშაულებრივი ქმედება გამოვლინდება, პროკურატურის პოზიცია უმკაცრესი იქნება.
„ვუსამძიმრებ დაღუპულების ოჯახს. გამოძიებას ამასთან დაკავშირებით მთავარი პროკურატურა არ აწარმოებს. მაგრამ, ბუნებრივია, ყველა მიმდინარე საქმეზე საპროკურორო ზედამხედველობას ახორციელებს პროკურატურა და უწყება იმოქმედებს კანონის უზენაესობის პრინციპის დაცვით.
თუ კონკრეტული პირების დანაშაულებრივი ქმედება გამოვლინდება, პროკურატურის პოზიცია იქნება უმკაცრესი“, - თქვა შალვა თადუმაძემ იურიდიულ საკითხთა კომიტეტის სხდომაზე მისი მოსმენისას.
დღეს ტყიბულში, მინდელის სახელობის შახტში 4 მეშახტე დაიღუპა, 6 კი დაშავდა.
როგორც პროფკავშირების წარმომადგენელმა ილია ლეჟავამ „ლიბერალს“ უთხრა, 4 მეშახტე მძიმე დამწვრობით საავადმყოფოშია გადაყვანილი, ორმა მეშახტემ კი მსუბუქი დაზიანება მიიღო.
შსს-ს ინფორმაციით, გამოძიება სისხლის სამართლის კოდექსის 240-ე მუხლის მეორე ნაწილით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესების დარღვევას გულისხმობს, რამაც ადამიანის სიცოცხლის მოსპობა გამოიწვია.
