გრენლანდიაში ერთ-ერთ სოფელს ივნარსუიტს არქტიკიდან დაძრული უზარმაზარი აისბერგი მიუახლოვდა. ყინულის გიგანტი, რომელიც 11 მილიონ ტონას იწონის, სოფელს განადგურებით ემუქრება.
ჯერჯერობით, უცნობია, მშვიდად ჩაუვლის თუ არა აისბერგი სანაპიროს, მაგრამ იმ შემთხვევაში, თუ აისბერგს ყინულის ნაწილი მოწყდება, პატარა სოფელი შეიძლება ცუნამმა წალეკოს. დიდი აისბერგები ნელ-ნელა არ დნებიან, ისინი ჯერ ნაწილად იხლიჩებიან. „ეს არ არის მშვიდი პროცესი“, - უთხრა The New York Times-ს კოლუმბიის უნივერსიტეტის კლიმატის მკვლევარმა, იორგ შაფერმა.
200 მეტრის სიგანისა და თითქმის 100 მეტრამდე სიმაღლის აისბერგი ძლიერი ქარის შემთხვევაში შესაძლოა, სანაპიროსაც შეეჯახოს, რაც ასევე კრიზისს გამოიწვევს.
ივნარსუიტში სულ 169 მოსახლეა. 33 ადამიანი, რომელიც ოკეანის სანაპიროზე ცხოვრობს, პოლიციის გადაწყვეტილებით, უკვე ევაკუირებულია. ხელისუფლება მოუწოდებს ადგილობრივ მცხოვრებლებს, იფრთხილონ, მოარიდონ თავიანთი ნავები იმ მხარეს, საიდანაც სოფელს აისბერგი მიუახლოვდა.
„ისინი კარგავენ ნავებს. არ შეუძლიათ, სათევზაოდ ან სანადიროდ წავიდნენ“, - განაცხადა დედაქალაქის პოლიციის ინსპექტორმა, გიდეონ ქუისტმა. ადგილობრივი ხელისუფლების განცხადებით, აისბერგი ყველაზე მასიურია, რაც კი აქამდე სოფლის მცხოვრებლებს უნახავთ.
გადაუდებელი საჭიროებისთვის ივნარსუიტთან დგას დანიის სამეფოს გემიც, მოსახლეობა კი ამინდის პროგნოზს და აისბერგის მოძრაობას ადევნებს თვალს.
ფოტო: Mette Kristensen/knr.gl