დღეს დილით, ტყიბულში, შახტში დაშავებული მუშების მდგომარეობის შესახებ „ლიბერალი“ ტყიბულის საავადმყოფოს ექიმს იური ელიაშვილს ესაუბრა.
მისი თქმით, დილით, საავადმყოფოში მიიღეს 6 პაციენტი, რომლებსაც სხვადასხვა დონის დამწვრობა აღენიშნებოდათ. სამ მათგანს ჰქონდა მძიმე დამწვრობა (მეორე-მესამე ხარისხის), იყვნენ შოკურ მდგომარეობაში. შოკური მდგომარეობიდან გამოყვანის შემდგომ კი ისინი კატასტროფის ბრიგადამ თბილისში, დამწვრობის ცენტრში გადაიყვანა.
ექიმის თქმით, ორი პაციენტს აღენიშნებოდა მსუბუქი დამწვრობა, რომლებიც დამატებითი დაიაგნოზის დადგენის მიზნით, მოგვიანებით გადაიყვენეს თბილისში. ერთ დაშავებულს კი ჩაუტარდა ამბოლატორიული მკურნალობა და საავადმყოფოდან გაწერეს.
დღეს დილით ტყიბულში, მინდელის სახელობის შახტში 4 მეშახტე დაიღუპა, 6 კი დაშავდა.
„გამოძიების პირველადი ინფორმაციით, შახტის ერთ-ერთ გვირაბში, სავარაუდოდ მეთანის აფეთქების შედეგად კედლების დეფორმაციას ჭერის ჩამოშლა მოჰყვა. სხეულის მძიმე დაზიანებები მიიღეს შახტის მიწისქვეშა სამთო ოსტატებმა - 1961 წელს დაბადებულმა მ.ლ-მ, 1963 წელს დაბადებულმა მ.გ.-მ, 1988 წელს დაბადებულმა ლ.ფ-მ და 1961 წელს დაბადებულმა ი.ქ-მ, რომლებიც მიღებული
დაზიანებების შედეგად ადგილზე გარდაიცვალნენ“,- ნათქვამია შსს-ს განცახდებაში.
შსს-ს ინფორმაციით, გამოძიება სისხლის სამართლის კოდექსის 240-ე მუხლის მეორე ნაწილით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესების დარღვევას გულისხმობს, რამაც ადამიანის სიცოცხლის მოსპობა გამოიწვია.