„იუვენტუსი მსოფლიოში ერთ-ერთი საუკეთესო კლუბია. იტალიის საუკეთესო გუნდში გადმოსვლა დიდ ხანს ნაფიქრი, მაგრამ მარტივად გადასადგმელი ნაბიჯი იყო. ეს ძალიან მნიშვნელოვანი ნაბიჯია ჩემს ცხოვრებაში“, - ტურინის „იუვენტუსმა“ კრიშტიანო რონალდუ ოფიციალურად წარადგინა. პრესკონფერენციამდე პორტუგალიელმა ფორვარდმა სამედიცინო შემოწმება გაიარა, დაათვალიერა კლუბის საწვრთნელი ბაზა და ფანებსაც შეხვდა.

„მადრიდის რეალის“ ყოფილი ფეხბურთელის თქმით, ესპანეთში მისთვის ბრწყინვალე პერიოდი იყო და „რეალის“ გულშემატკივრის ახლაც მადლიერია, თუმცა კარიერაში ახალი გამოწვევა სურდა და ერთი სული აქვს, როდის დაიწყება სეზონი.

„რეალში“ გატარებული 9-წლიანი პერიოდის შემდეგ, 33 წლის ასაკში კრიშტიანო რონალდუ კარიერას „იუვენტუსში“ განაგრძობს, მადრიდულმა კლუბმა მის სანაცვლოდ 105 მილიონი გირვანქა სტერლინგი მიიღო.