„რუსეთის პრეზიდენტის განცხადება პირდაპირი მუქარაა, რადგან პუტინი მიიჩნევს, რომ საქართველოს NATO-ში გაწევრება რუსეთის სტრატეგიულ ინტერესებს უპირისპირდება“, – ამის შესახებ „საზოგადოებრივი მაუწყებლის“ ცნობით, საქართველოს პარლამენტის ვიცე-სპიკერმა გია ვოლსკიმ განაცხადა. 

„პუტინი თავის გარშემო პოლიტიკის გატარებას არ დაუშვებს საკუთარი ნების ან ინტერესების გათვალისწინების გარეშე. მე, როგორც ერთ დეპუტატს, შემიძლია ვთქვა, რომ საქართველოს თუკი საერთაშორისო ორგანიზაციაში, მათ შორის NATO-ში სურს გაწევრება, ეს განვითარება აგრესიული მიმართულებით არავისკენ არ მოხდება. ერთადერთი, რაც ჩვენი მისწრაფებაა, ვიყოთ უზრუნველყოფილი უსაფრთხოებით გრძელვადიან პერსპექტივაში, რათა არ შეეხოს საქართველოს ის აგრესია, რაც ჩვენ დღევანდელ ჩრდილოვან მეზობელს აქვს“, – განაცხადა გია ვოლსკმა.

რუსეთის პრეზიდენტის, ვლადიმირ პუტინის თქმით, NATO-ში საქართველოსა და უკრაინის გაწევრება მისი ქვეყნის ნაციონალურ უსაფრთხოებას საფრთხეს უქმნის. ამის გამო, რუსეთს ჩრდილოატლანტიკურ ალიანსში ამ ორი ქვეყნის მიღებაზე უკიდურესად უარყოფითი რეაქცია ექნება. ამის შესახებ რუსეთის პრეზიდენტმა Fox News-თან ინტერვიუში ისაუბრა.

„საქართველოსა და უკრაინის NATO-ში გაწევრებაზე უკიდურესად ნეგატიური რეაქცია გვექნება“ - პუტინი