საქართველოს პრემიერ-მინისტრი მამუკა ბახტაძე ანტიგუა და ბარბუდას პრემიერს, გასტონ ალფონსო ბრაუნს შეხვდა. ის საქართველოში პირველად იმყოფება. მთავრობის ადმინისტრაციაში გამართულ შეხვედრას საგარეო საქმეთა მინისტრი დავით ზალკალიანი ესწრებოდა.
მთავრობის ადმინისტრაციის ცნობით, მხარეებმა ორ ქვეყანას შორის ხალხთაშორისი კავშირების გააქტიურებაზე ისაუბრეს, განსაკუთრებით კი ახალგაზრდებში. მათ ქვეყნებს შორის არსებული და სამომავლო ურთიერთობების აქტუალური თემებიც მიმოიხილეს და ორმხრივ და მრავალმხრივ ფორმატებში თანამშრომლობაზე იმსჯელეს.
მთავრობის ადმინისტრაციის განმარტებით, პრემიერებმა საერთაშორისო ორგანიზაციების ფარგლებში ორი ქვეყნისთვის პრიორიტეტულ საკითხებზე ურთიერთმხარდაჭერისა და კოორდინირებული მუშაობის მნიშვნელობაზეც ისაუბრეს.
როგორც შეხვედრაზე გასტონ ალფონსო ბრაუნმა აღნიშნა, ანტიგუა და ბარბუდა მხარს უჭერს საქართველოს ტერიტორიულ მთლიანობასა და სუვერენიტეტს, საერთაშორისოდ აღიარებულ საზღვრებში.
