დღეს პროკურატურაში გამოკითხვაზე იმყოფებოდნენ რეგიონების განვითარებისა და ინფრასტრუქტურის ყოფილი მინისტრი ზურაბ ალავიძე და ეკონომიკისა და მდგრადი განვითარების ყოფილი მინისტრი დიმიტრი ქუმსიშვილი.
როგორც გამოკითხვის დასრულების შემდეგ ალავიძემ განაცხადა, შეკითხვები ტენდერებში გამარჯვებულად გამოვლენილ კომპანიებს და შესყიდვებს შეეხებოდა.
„ვიმყოფებოდი მთავარ პროკურატურაში მიმდინარე გამოძიებასთან დაკავშირებით. გამოკითხვაზე შეკითხვები შეეხებოდა ჩემს თანამდებობაზე დანიშვნამდე და ასევე შემდგომ პერიოდში ტენდერებში გამარჯვებულად გამოვლენილ კომპანიებს და შესყიდვებს. გამოძიებას მივაწოდე ჩემს ხელთ არსებული სრული და ამომწურავი ინფორმაცია“,- განმარტავს ალავიძე.
დიდი ოდენობით თანხის გაფლანგვის საქმეზე პროკურატურაში ალავიძე და ქუმსიშვილი გამოკითხეს
საქართველოს მთავარი პროკურატურის ინფორმაციით, უწყების საგამოძიებო ნაწილში მიმდინარეობს გამოძიება საქართველოს ეკონომიკისა და მდგრადი განვითარების სამინისტროს, ასევე რეგიონული განვითარებისა და ინფრასტრუქტურის სამინისტროს ცალკეულ მოხელეთა მიერ სამსახურებრივი უფლებამოსილების ბოროტად გამოყენებისა და დიდი ოდენობით საბიუჯეტო თანხის მართლსაწინააღმდეგოდ მითვისება/გაფლანგვის ფაქტებზე. სწორედ ამ საქმესთან დაკავშირებით იმყოფებოდნენ გამოკითხვაზე ყოფილი მინისტრები.
