„ქართული ოცნება - დემოკრატიული საქართველოს“ სამდივნომ პარტიიდან დავით ჭიჭინაძის გარიცხვის გადაწყვეტილება გუშინ, 18 ივლისს მიიღო.
ჭიჭინაძის უკვე ყოფილი თანაგუნდელი, სოფო კილაძე ამბობს, რომ თავადაც აქვს განსხვავებული აზრი - ეს გამოუხატავს კიდეც სახალხოდ, მაგრამ ამის გამო პარტიიდან არ გაურიცხავთ. კილაძის თქმით, პარტიიდან გარიცხვის მიზეზი შეურაცხმყოფელი განცხადება იყო.
„ჩვენს პარტიაში საზოგადოებას არაერთხელ გაუგია სხვადასხვა განსახვევებული აზრი, სხვადასხვა საკითხთან დაკავშირებით - ეს არის ძალიან ნორმალური. მე პირადადაც მაქვს განსხვავებული აზრი, გამომიხატავს კიდეც ეს აზრი სახალხოდ და ამისთვის არავის გავურიცხივარ პარტიიდან. მთავარი, რაც მე არ გამიკეთებია არის ის, რომ სხვა ადამიანებისთვის შეურაცხყოფა არ მიმიყენებია ჩვენს პარტიაში. შეურაცხყოფა ზოგადად დაუშვებელია, გუნდის წევრების მიმართაც არის დაუშვებელი. და მე ღრმად ვარ დარწმუნებული, რომ დავით ჭიჭინაძის გარიცხვის საფუძველი არ იყო კრიტიკული აზრი, არამედ ეს იყო შეურაცხყოფა“, - ამბობს კილაძე
„ქართული ოცნების“ წევრმა, გედევან ფოფხაძემ ჭიჭინაძის გარიცხვის გადაწყვეტილების გამო პარტია კომკავშირს შეადარა. რაზეც სოფო კილაძე აცხადებს, რომ თუ თავად მიიჩნევდა, რომ „კომპარტიაში“ არის, იმ პარტიას დატოვებდა.