თბილისის მერიას დიღმის მასივში მწვანე სივრცის დაბრუნება სურს, რომლის ნაწილიც დღეს კერძო საკუთრებაშია. დიღმის ტყე-პარკის მუნიციპალურ საკუთრებაში დაბრუნებაზე ქალაქის მთავრობამ ნაკვეთების მფლობელებთან მოლაპარაკებები დაიწყო.

როგორც „ლიბერალს“ მერიაში უთხრეს, დიღმის ტყე-პარკი დაახლოებით 20 ჰექტრამდე ტერიტორიას მოიცავს, აქედან ნახევარი დღეს კერძო საკუთრებაშია გადასული. როგორც მერიაში ამბობენ, პარკის დაბრუნებაზე მოლაპარაკებები ახალი დაწყებულია და ჯერ არ შეუძლიათ თქმა, რა შედეგით დასრულდება მოლაპარაკებები და რა თანხა დაუჯდება მუნიციპალიტეტს მისი დაბრუნება.

თბილისის მერის მოადგილის მაია ბითაძის განცხადებით, დედაქალაქის ახალი გენგეგმით ტერიტორიას ლანდშაფტურ-სარეკრეაციო ტერიტორიის ზონის სტატუსი ექნება, რის გამოც მესაკუთრეებს მშენებლობის ნებართვა ამ ტერიტორიაზე არ ექნებათ. ბითაძის ინფორმაციით, მესაკუთრეთა ნაწილი თანახმაა ტერიტორიის მონაცვლეობაზე ან კომპენსაციის მიღებაზე.

ტყე-პარკი დიღმის მასივში, საქართველოს სამხედრო გზის, ახმეტელისა და ლუბლიანის ქუჩებს შორის მდებარეობს. ამ ადგილას სარეკრეაციო ზონის შექმნა 1934 წლიდან დაიწყო, მას შემდეგ, რაც ტერიტორიაზე თბილისის საბაზისო სანერგე მეურნეობა დაარსდა. მაშინდელი ქალაქის გენგეგმის მიხედვით, ტყე-პარკის ტერიტორია 75 ჰექტარს შეადგენდა.