ისრაელის საკანონმდებლო ორგანოში მწვავე დებატების შემდეგ საკამათო კანონი მიიღეს. ამიერიდან ისრაელი ებრაელთა ეროვნულ სახელმწიფოდ იწოდება, რასაც ქვეყანაში მცხოვრები არაბების მხარდამჭერი პარტიები ეწინააღმდეგებოდნენ.
ქნესეთში კანონპროექტს 62-მა დეპუტატმა დაუჭირა მხარი, 55-მა კი ხმა მის წინააღმდეგ მისცა. კანონის მიღებას ოპოზიციონერ დეპუტატთა პროტესტი მოჰყვა. პარლამენტარებმა კანონის ასლები დახიეს, ერთ-ერთმა დეპუტატმა კი შავი დროშა ააფრიალა.
ქვეყნის პრემიერ-მინისტრმა, ბენიამინ ნეთანიაჰუმ კანონის მიღება ქვეყნისთვის ერთ-ერთ ყველაზე მნიშვნელოვან მომენტად შეაფასა. მისი თქმით, ეს წოდება მისი ხალხის იდენტობას განსაზღვრავს.
ქვეყნის სახელწოდებასთან ერთად, ახალი კანონი ისრაელის დედაქალაქად ერთიან და განუყოფელ იერუსალიმს ასახელებს, ხოლო ებრაულ ენას ქვეყნის ერთადერთ სახელმწიფო ენად განსაზღვრავს.
მმართველი მემარჯვენე პარტიის ინიციატივას პროტესტით შეხვდნენ ისრაელში მცხოვრები არაბები, რომლებიც ქვეყნის მოსახლეობის 20%-ს შეადგენენ.
