რუსეთის მომხმარებელთა უფლებების დაცვის ფედერალური ორგანოს „როსპოტრებნადზორის“ განცხადებით, მათ დაიწყეს ქართული ალკოჰოლური სასმელების შემოწმება და მათმა ნაწილმა ხარისხის კონტროლი ვერ გაიარა. წელს რუსეთმა ამის გამო 16 000 ლიტრი ქართული ალკოჰოლური პროდუქცია ქვეყანაში არ შეუშვა.
„როსპოტრებნადზორის“ განცხადებით, 2018 წლის პირველ ნახევარში შესული ალკოჰოლური პროდუქციის ხარისხი რუსეთის ფედერაციის ტექნიკურ რეგლამენტს და მომხმარებლის უფლების შესახებ არსებულ კანონს არ შეესაბამებოდა. შესაბამისად, რუსეთის ბაზარზე ქართული ალკოჰოლური სასმელი არ დაუშვეს.
„ხარისხისა და პროდუქციის უსაფრთხოების ანალიზი წარმოების ტექნოლოგიების დარღვევასა და გამოშვებული პროდუქციის არასათანადო კონტროლზე მიუთითებს“, - აღნიშნულია „როსპოტრებნადზორის“ ოფიციალურ ვებგვერდზე განთავსებულ განცხადებაში.
„როსპოტრებნადზორის“ განცხადებით, რუსეთის ტერიტორიაზე შესული ალკოჰოლურ პროდუქციის ხარისხის კონტროლი გამკაცრდება.
