რუსეთსა და საბერძნეთს შორის ურთიერთობა გამწვავდა. ათენიდან ორ რუს დიპლომატს აძევებენ, კიდევ ორს კი ქვეყანაში შესვლას აუკრძალავენ. სანაცვლოდ, რუსეთის საგარეო საქმეთა მინისტრი საბერძნეთში დაგეგმილ ვიზიტს აუქმებს.
ათენსა და მოსკოვს შორის მეგობრული ურთიერთობის გამწვავება მაკედონიის საკითხმა გამოიწვია. საბერძნეთმა და მაკედონიამ 20-წლიანი დაპირისპირება მაკედონიის სახელწოდების გამო ახლა დაასრულეს. საბერძნეთის მეზობელი სახელმწიფო ამიერიდან ჩრდილო მაკედონიად იწოდება და NATO-სკენ გზაც გაეხსნა.
მოსკოვში NATO-ს ნებისმიერი მიმართულებით გაფართოება არ სიამოვნებთ. სწორედ ამიტომ, როგორც აღმოჩნდა, ამ ორი ქვეყნის კონფლიქტის გამწვავებას რუსეთი ცდილობდა.
საბერძნეთის ხელისუფლების მტკიცებით, მათ აქვთ უტყუარი მტკიცებულებები, როგორ ცდილობდა რუსეთი ირიბი გზებით მოლაპარაკების ჩაშლას. მთავრობა ამტკიცებს, რომ რუსეთი აფინანსებდა საპროტესტო აქციებს, ცდილობდა საჯარო მოხელეებისა და პოლიტიკოსების მოსყიდვას.
საბერძნეთში რუსეთის ელჩი სერგეი მასლოვი ბრალდებებს უარყოფს. მისი თქმით, ათენის გადაწყვეტილებას საპასუხო ნაბიჯები მოჰყვება. ამ ფონზე კი ლავროვის ვიზიტი უადგილო იქნებოდა.
ინგლისში სკრიპალის მოწამვლის გამო რუსი დიპლომატების გაძევების ტალღას, სხვა ევროპული ქვეყნებისგან განსხვავებით, საბერძნეთი არ შეერთებია. ათენსა და მოსკოვს ახლო ურთიერთობები ჰქონდათ, მაგრამ მაკედონიის საკითხი საბერძნეთის ეროვნულ ინტერესებშია და როგორც ოფიციალური პირები ამბობენ, მათი ქვეყნის უპატივცემულობას მარტივად არ შეეგუებიან.
