საგანგებო სიტუაციების მართვის სამსახურის ყოფილი ხელმძღვანელის, გიორგი მღებრიშვილის ინფორმაციით, მან პრემიერ-მინისტრს გადადგომის თაობაზე თავად მიმართა და არც თხოვნა და არც მოთხოვნა არავის მხრიდან ყოფილა.
როგორც მან „იმედის“ ეთერში განაცხადა, ეს გადაწყვეტილება ოჯახისა და მცირეწლოვანი შვილების გამო მიიღო, რათა საჯარო სამსახურში 22-წლიანი მუშაობის შემდეგ დრო მათთვისაც დაეთმო.
„ძალიან ბევრი ინტერპრეტაცია მოვისმინე, ძალიან ბევრი სასცილო ინტერპრეტაციაც. სრული პასუხისმგებლობით ვამბობ, რომ მე მივმართე პრემიერს თხოვნით გავეთავისუფლებინე დაკავებული თანამდებობიდან. არც თხოვნა ყოფილა, არც მოთხოვნა, ჩემი თხოვნა იყო პრემიერისადმი, რომ გამათავისუფლოს დაკავებული თანამდებობიდან. მე ამაში ვერაფერ საოცარს ვერ ვხედავ. ეს გადაწყვეტილება იმიტომ მივიღე, რომ დაახლოებით 22 წელია საჯარო სამსახურში ვმუშაობ და ვფიქრობ, ჩემი ცხოვრების ნაწილი ჩემს მცირეწლოვან შვილებსაც უნდა დავუთმო“,- განაცხადა გიორგი მღებრიშვილმა.
გიორგი მღებრიშვილი საგანგებო სიტუაციების სამსახურის უფროსის თანამდებობიდან გადადგა
მან თანამდებობა გუშინ დატოვა. საგანგებო სიტუაციების მართვი სამსახურის ინფორმაციით, მღებრიშვილმა გადადგომის შესახებ განცხადებით პრემიერს მიმართა. მამუკა ბახტაძემ მისი განცხადება დააკმაყოფილა.
პრესსამსახურის ინფორმაციით, საგანგებო სიტუაციების სამსახურის უფროსის მოვალეობას შალვა ხუციშვილი შეასრულებს.
გიორგი მღებრიშვილი 2014 წლის ივლისიდან 2015 წლის აგვისტომდე სასჯელაღსრულების მინისტრი იყო, 2015-2017 წლებში - შს მინისტრი, 2017 წლის ნოემბრიდან კი საგანგებო სიტუაციების მართვის სააგენტოსა და სახელმწიფო უსაფრთხოებისა და კრიზისების მართვის საბჭოს შერწყმის შედეგად შექმნილ საგანგებო სიტუაციების მართვის ცენტრს ხელმძღვანელობდა.