საგანგებო სიტუაციების მართვის სამსახურის ინფორმაციით, კახეთში ძლიერი ნალექის გამო, რამდენიმე სოფელში სანიაღვრე არხები ადიდდა, დაიტბორა რამდენიმე სახლის ეზო და სარდაფი.
საგანგებო სიტუაციების მართვის სამსახურში შევიდა 6 შეტყობინება: ლაგოდეხის სოფელ ჰერეთიკარიდან და სიღნაღის მუნიციპალიტეტის 3 სოფლიდან - ანაგა, ვაქირი, მაღარო.
სოფელ ვაქირში, ხევის ადიდების გამო 4 ავტომანქანა ჩარჩა წყალში. საგანგებო სიტუაციების მართვის სამსახურის მაშველებმა 6 მოქალაქე გამოიყვანეს უსაფრთხო ადგილზე.
როგორც უწყებაში აცხადებენ, ლაგოდეხისა და სიღნაღის რაიონების სოფლებში მობილიზებულია ყველა შესაბამისი სამსახური.
