ქუთაისში, გორას დასახლებაში, ცაცხვების ქუჩაზე საცხოვრებელი სახლის მშენებლობის ადგილას ძველი ქუთაისის აქამდე უცნობი დასახლება აღმოაჩინეს. „ქუთაისი პოსტის“ ინფორმაციით, გათხრებისას ნაპოვნია დაუკირავი ქვევრები, თონეები, დოქები, ჯამები, სამარილეები, მინის სამაჯურები, ლითონის ნივთები, კრამიტის ფრაგმენტები.
„ჩვენ გვქონდა საფუძვლიანი ეჭვი, რომ ამ ტერიტორიაზე ძველი ქუთაისის აქამდე უცნობი უბანი იყო. ამიტომ სამშენებლო სამუშაოებს თვალყურს ვადევნებდით. ეს დასახლება უნდა იყოს ძველი ქალაქის სამეურნეო უბანი. სადაც აღმოჩენილია ქვევრების, თონეების, ჭა-მაცივრების და მინისა და კერამიკული ნაწარმის ნაშთები, რომლებიც მე-11 მე-13 საუკუნეებით თარიღდება”,-განაცხადა პირველ არხთან საქართველოს კულტურული მემკვიდრეობის დაცვის ეროვნული სააგენტოს ქუთაისის ისტორიულ არქიტექტურული მუზეუმ ნაკრძალის მმართველმა როლანდ ისაკაძემ.
აღმოჩენილ ნივთებს სახელმწიფო საცავში გადაიტანენ.
ფოტო: „ქუთაისი პოსტი“
