„მეშახტეების ბრძოლა“ - ტყიბულში აქცია მიმდინარეობს. მეშახტეები ქალაქის ცენტრში სიტყვით გამოდიან და ტყიბულელებს გარეთ გამოსვლისკენ მოუწოდებენ. ყოფილი მეშახტე ლევან ბეშკენაძე მათ მოთხოვნებზე საუბრობს. მისი თქმით, საქართველოს ინდუსტრიულ ჯგუფს სურს,  სახელმწიფოს გადასცეს შახტები. ეს არ უნდა ნიშნავდეს იმას, რომ მათ პასუხი არ აგონ ბოლომდე. 

„თქვენ იცით, როგორი მდგომარეობაა მთელი ქვეყნის მასშტაბით, ზოგადად, შრომის უსაფრთხოების მხრივ. პირველი, უპირობო მოთხოვნაა, რომ ქვეყანამ მიიღოს ისეთი კანონები, რომლებიც მორგებული იქნება მუშაზე და არა ბიზნესკლანებზე. მოთხოვნა ეხება პასუხისმგებლობის საკითხს. პასუხისმგებლობა ეკისრება ჩვენი გადმოსახედით ყველაზე დაბალ რგოლს, შახტის ადმინისტრაციას.

მაგრამ არ დაგვავიწყდეს ის, თუ ვისი მოყვანილნი არიან ისინი და ვინ დანიშნა ამ ადგილზე. ის რომ, GIG-ს სურს სახელმწიფოს საჩუქრად გადასცეს შახტი, ასე არ არის. მათ თავიანთი წილი პასუხისმგებლობა აქვთ და ამ პასუხისმგებლობას უნდა გაჰყვნენ ბოლომდე. მაშინაც კი, თუ  არ იქნებიან ტყიბულის შახტების მფლობელები. მათ ეკისრებათ პასუხისმგებლობა 50-მდე მოკლულ ჩვენს თანამოქალაქეზე. ასევე, 50-მდე დაშავებულ ჩვენს მოქალაქეზე. მათ ეკისრებათ პასუხისმგებლობა, თუ რა დღეში ჩააგდეს ზოგადად ეს ქალაქი. ამ პასუხისმგებლობას ისინი ვერ გაექცევიან“, - განაცხადა ლევან ბეშკენაძემ.