ჩინეთში მიმდინარე მსოფლიო ჩემპიონატი საქართველოს მოფარიკავეთა ნაკრებმა ისტორიული შედეგით დაასრულა. ხმლით მოასპარეზე გუნდურ შეჯიბრებაზე საქართველოს ნაკრები მეოთხე ადგილზე გავიდა.

საქართველოს ფარიკაობის ფედერაციის ცნობით, ქართველმა სპორტსმენებმა ტაილანდის 45:20 დამარცხების შემდეგ მსოფლიო რეიტინგის მეხუთე ნაკრებს აშშ-ს ანგარიშით 45:38 მოუგეს და მეოთხედფინალში გავიდნენ. მეოთხედფინალში საქართველოს ნაკრებმა რეიტინგით მეოთხე ირანი ანგარიშით 45:37 დაამარცხა. 

საქართველოს ნაკრები ნახევარფინალში მსოფლიოს პირველ ნაკრებთან სამხრეთ კორეასთან 34:45 დამარცხდა, მესამე ადგილისთვის ბრძოლაში კი მოფარიკავეებმა ასევე ერთ-ერთ ლიდერთან უნგრეთთან მძიმე ბრძოლაში ანგარიშით 36:45 წააგეს.

საბოლოოდ, ქართველმა სპორტსმენებმა სანდრო ბაზაძემ, ბექა ბაზაძემ, მიხეილ მარდალეიშვილმა და ვაჟა რეჭიამ მსოფლიო ჩემპიონატი მეოთხე ადგილზე დაასრულეს, რაც საქართველოს ნაკრებისთვის ისტორიული შედეგია.