ბერი გაბრიელ სალოსის ქუჩაზე ანტიტერორისტულ სპეცოპერაციასთან დაკავშირებული პირების მიმართ თბილისის საქალაქო სასამართლომ გამამტყუნებელი განაჩენი გამოიტანა.

მოსამართლემ, ლავრენტი მაღლაკელიძემ ექვსივე ბრალდებული ტერორიზმის მხარდაჭერის საქმეზე სრულად ცნო დამნაშავედ.

მოსამართლის გადაწყვეტილებით, რუსლან შავაძეს და შოაიფ ბორზიევს 13-13 წლით თავისუფლების აღკვეთა შეეფარდათ, რუსლან ალდამოვს და ანატოლი ბერძენიშვილს - 11-11 წლით, რამაზ მარგოშვილს - 12 წლით, ზურაბ იდოიძეს კი - 10 წლით.

ანტიტერორისტული სპეცოპერაცია თბილისში, ბერი გაბრიელ სალოსის ქუჩაზე 21-22 ნოემბერს ჩატარდა. სპეცოპერაციისას სამართალდამცველებმა მოკლეს ორი პირი, მესამემ აჰმედ ჩატაევმა კი თავი აიფეთქა. ორმხრივი დაპირისპირებისას დაიღუპა ერთი სპეცრაზმელიც.

სპეცოპერაციამდე პოლიციამ დაჯგუფების ერთი წევრი შოაიფ ბორზიევი დააკავა. მას ტერორისტული ორგანიზაციის წევრობა ედება ბრალად.

ამ საქმეზე ანტიტერორისტული სპეცოპერაცია სუს-მა 26 დეკემბერს უკვე პანკისის ხეობაში ჩაატარა. სპეცოპერაციისას სპეცრაზმმა მძიმედ დაჭრა თემირლან მაჩალიკაშვილი, რომელიც მოგვიანებით გარდაიცვალა.

პანკისის ხეობაში სუს-მა დააკავა ტერორიზმში ბრალდებულთა ჯგუფთან კავშირზე მყოფი პირები რუსლან ალდამოვი, ბადურ ჩოფანაშვილი, რამაზ მარგოშვილი და ზურაბ გორნაკაშვილი.

კიდევ ორი პირი ანატოლი ბერძენიშვილი და ზურაბ იდოიძე სახელმწიფო უსაფრთხოების სამსახურმა მოგვიანებით დააკავა. ყველა მათგანს გამოძიება ტერორისტული საქმიანობის სხვაგვარ მატერიალურ მხარდაჭერას და რესურსებით უზრუნველყოფას ედავება.