რუსეთის პანკ-ჯგუფის Pussy Riot-ის წევრები ორშაბათს ციხიდან გათავისუფლებისთანავე ისევ დაიჭირეს. ისინი საფრანგეთ-ხორვატიის ფინალური მატჩის დროს პოლიციის ფორმაში ჩაცმულები სტადიონზე შეიჭრნენ. როგორც თავად განაცხადეს,  ეს იყო პროტესტი, რადგან რუსეთში ადამიანის უფლებები ირღვევა.  

ჯგუფი Twitter-ზე წერს, რომ პოლიციამ ჯგუფის წევრებს მეორე ბრალდება წაუყენა, რადგან მათ საჯარო ივენთი წინასწარი შეტყობინების გარეშე გამართეს. 

2012 წლის თებერვალში Pussy Riot-ის წევრებმა: ნადეჟდა ტოლოკონნიკოვამ, მარია ალიოხინამ და ეკატერინა სამუჩევიჩმა მოსკოვის მაცხოვრის ტაძარში მოაწყვეს აქცია, რომლის დროსაც საკურთხეველთან შეასრულეს პანკ-ლოცვა „ღვთისმშობელო, გააგდე პუტინი”. იმავე წლის 17 აგვისტოს მოსკოვის რაიონულმა სასამართლომ ისინი რელიგიური სიძულვილის მოტივებით ჩადენილ ხულიგნობაში დამნაშავედ ცნო და ორწლიანი პატიმრობა მიუსაჯა. თავად ჯგუფის წევრებმა ბრალი არ აღიარეს და განაცხადეს, რომ პერფორმანსი პოლიტიკური ხასიათის იყო და მორწმუნეთა შეურაცხყოფას არ ისახავდა მიზნად.

Pussy Riot-ის წევრები პუტინის მიერ ხელმოწერილი ამნისტიის ფარგლებში 2013 წლის დეკემბერში გაათავისუფლეს.