„ქართული ოცნება“ საპრეზიდენტო არჩევნებში კანდიდატს არ წარადგენს - ამის შესახებ ირაკლი კობახიძემ „ქართული ოცნების“ ცენტრალურ ოფისში უმრავლესობის, პოლიტსაბჭოს წევრებისა და მთავრობის წარმომადგენელთა შეხვედრის შემდეგ განაცხადა.
მისი თქმით, პარტიამ შესაძლოა, რომელიმე კანდიდატს დაუჭიროს მხარი მას შემდეგ, რაც კანდიდატთა სრული სია გახდება ცნობილი, თუმცა. კობახიძის განცხადებითვე, ასევე შესაძლებელია, არც ერთ კანდიდატს მხარი არ დაუჭირონ.
„ჩვენ გვყავს არაერთი კანდიდატი, რომელსაც პირველივე ტურში დამაჯერებელი გამარჯვების მოპოვება შეუძლია, მაგრამ „ქართული ოცნება“ უარს ამბობს საპრეზიდენტო არჩევნებში თავისი კანდიდატის წარდგენაზე“, - განაცხადა ირაკლი კობახიძემ.
მისი თქმით, აღნიშნული გადაწყვეტილება მიიღეს შემდეგ მოსაზრებებზე დაყრდნობით:
„საქართველოს კონსტიტუციის თანახმად, საქართველო არის საპარლამენტო რესპუბლიკა, საადაც ხალხის მიერ ძალაუფლების ლეგიტიმაცია ხორციელდება საპარლამენტო არჩევნების საფუძვლზე. ხალხი ირჩევს პარლამენტს, რომელიც განსაზღვრავს ქვეყნის საშინაო და საგარეო პოლიტიკის ძირითად მიმართულებებს და აყალიბებს მთავრობას, რომელიც განსაზღვრავს ქვეყნის საშინაო და საგარეო პოლიტიკას. ამ სისტემაში პრეზიდენტს არ აქვს მინიჭებული პოლიტიკური ძალაუფლება. და მას არსებითად ეკისრება წარმომადგენლობითი ფუნქციები.
პრეზიდენტი უნდა იყოს პოლიტიკურად ნეიტრალური, ზეპარტიული უმაღლესი თანამდებობის პირი, რომელიც არ ერთვება პარტიულ პოლიტიკურ დაპირისპირებაში, არამედ თვალყურს ადევნებს და ობიექტურად აფასებს ქვეყნის პოლიტიკური მდგომარეობის უმნიშვნელოვანეს საკითხებს. პრეზიდენტის თანამდებობაზე პარტიული კანდოდატის არჩევის პირობებში პრეზიდენტს გაუჭირდება ნეიტრალიტეტის შენარჩუნება და მისთვის კონტიტუციით დაკისრებული ფუნქციის სათანადოდ შესრულება“, - განაცხადა ირაკლი კობახიძემ.