საგანგებო სიტუაციების მართვის სამსახურის ინფორმაციით, ძლიერი წვიმის შედეგად ბათუმსა და ქობულეთში დატბორილია გზები, საცხოვრებელი სახლების ეზოები და პირველი სართულები. მათივე ინფორმაციით, ძლიერი ნალექის შედეგად საგანგებო სიტუაციების მართვის სამსახურში ამ დროისთვის ბათუმიდან შემოსულია 80 შეტყობინება, ხოლო ქობულეთიდან - 36.

უხვმა ნალექმა პრობლემები შექმნა სამეგრელოს რეგიონშიც. წვიმამ მდინარეებისა და ღელეების ადიდება გამოიწვია. საგანგებო სიტუაციების მართვის სამსახურის ინფორმაციით, წყლის ამოტუმბვითი სამუშაოები მიმდინარეობს: ზუგდიდში, სენაკში, ფოთში, ხობში, აბაშასა და მარტვილში.  ასევე აქტიურ რეჟიმში მიმდინარეობს გზების გაწმენდის პროცესი. მოქალაქეების სიცოცხლესა და ჯანმრთელობას საფრთხე არ შექმნია. 

ფოტო: რეზო ხარაზი