მშობიარობის შემდგომ ქალის გარდაცვალების ფაქტს შსს და რეგულირების სააგენტო შეისწავლის.
სამშობიარო სახლ „ნინოში“ მშობიარობის შემდეგ ახალგაზრდა ქალი 10 აგვისტოს გარდაიცვალა. როგორც „ინტერპრესნიუსთან“ „ნინოს“ დირექტორმა, ნინო კაკულიამ განუცხადა მშობიარობის შემდეგ დაწყებული გართულებების გამო აუცილებელი გახდა პაციენტის ღუდუშაურში გადაყვანა. ახალგაზრდა ქალი ღუდუშაურის კლინიკაში გარდაიცვალა.
სამედიცინო საქმიანობის სახელმწიფო რეგულირების სააგენტო სამშობიარო სახლ „ნინოსა“ და ღუდუშაურში შესვლის თაობაზე სასამართლოს შუამდგომლობით მიმართავს.
როგორც „ლიბერალს“ სააგენტოს კონტროლის დეპარტამენტის უფროსმა, ნინო ხუციშვილმა განუცხადა, შესწავლისთვის საჭირო პროცედურები უკვე დაწყებულია.
„შესწავლისთვის საჭირო პროცედურები უკვე დაწყებულია, მზადდება შაუამდგომლობა სასამართლოში შესატანად. როგორც კი გვექნება სასამართლოს გადაწყვეტილება, ადგილზე შევალთ და დავიწყებთ შესწავლას. რასაკვირველია, ორივე დაწესებულებაში, „ნინოსა“ და ღუდუშაურშიც სანახავია დოკუმენტაცია“, - განაცხადა კონტროლის დეპარტამენტის უფროსმა, ნინო ხუციშვილმა.
მომხდარზე გამოძიება შსს-მ სისხლის სამართლის კოდექსის 116-ე მუხლის 1-ელი ნაწილით დაიწყო.
