„ომი ჩვენ არ გადაგვიტანია, ჩვენ ის უბრალოდ არ შეგვიმჩნევია. ომი გადაიტანა საქართველომ, რომელსაც ტერიტორიის მნიშვნელოვანი ნაწილი წაგლიჯეს. ეს ომი საქართველომ გადაიტანა ან ბოლომდე ვერც გადაიტანა" - განაცხადა 9 აგვისტოს Эхо Москвы-ს ეთერში რუსმა მწერალმა, ვიკტორ შენდეროვიჩმა . ჟურნალისტის შეკითხვაზე, რომელშიც ის ამბობდა, რომ აგვისტოში რუსეთს ომის გადატანა მოუწია, შენდეროვიჩმა უპასუხა, რომ ომი რუსეთმა დაიწყო. 

„ჩვენ გონზეც ვერ მოვედით, ისე მივითვისეთ ტერიტორია და ეს ძალიან მნიშვნელოვანია. 10 წლის წინ ახალი რუსული იმპერიალიზმი დაავადების ღია ფაზაში შევიდა, როგორც ტუბერკულოზი. არის ხველება და სისხლის ამოხველება. აი, ჩვენ უკვე სისხლს ვახველებთ. დიდი ხანი ვემზადებოდით და 10 წლის წინ პუტინის პირველი ინტერვენცია მოხდა. იქამდე ფორმალურად საკუთარ ტერიტორიაზე ღვრიდნენ სისხლს ჩეჩნეთში, მერე კი საერთაშორისო სისხლის ნთხევა დაიწყეს" - თქვა შენდეროვიჩმა. 

მისივე თქმით, ოსეთში 10 წლის წინ აგრესია, მუქარა და ყველა პროპაგანდისტული და დიპლომატიური მექანიზმი გამოიყენეს.

„დასავლეთმა ეს გონზემოუსვლელად შეჭამა. მთელი ეს კომისიები, სარკოზი, ეს ყველაფერი სიბინძურეა. დასავლეთმა თვალის დაბრმავება არჩია, შედეგად კი დონბასი, მალაიზიური ბოინგი და სირია მიიღო - სულ ეს არის. ეს კი იმიტომ, რომ 10 წლის წინ გადაწყვიტეს, არ შეემჩნიათ, გაეტარებინათ პირველი ღია აგრესია" - თქვა შენდეროვიჩმა.

როგორც მან განაცხადა, ინანიებს, რომ 10 წლის წინ პუტინსა და სააკაშვილს თანაბრად სდებდა ბრალს. 

„უნდა მოვინანიო. 10 წლის წინ მასშტაბები ვერ წარმომედგინა. ვიცოდი, რომ ჩვენები იტყუებოდნენ, მაგრამ ტყუილის მასშტაბები ვერ წარმომედგინა, ამიტომაც 10 წლის წინ პასუხსმგებლობას თანაბრად ვაკისრებდი სააკაშვილსა და პუტინს. არ არსებობს არავითარი თანაბარი პასუხისმგებლობა. ომი ჩვენებმა დაიწყეს იქამდე. ჩვენმა მეომრება მოახდინეს პროვოცირება  და შევიდნენ მათ ტერიტორიაზე, ესროდნენ და აფეთქებდნენ, ომი 8 აგვისტომდე დაიწყო. სააკაშვილმა უკვე შეტევას უპასუხა" - თქვა მწერალმა.